სამოქალაქო ორგანიზაციების ნაწილი დანაშაულებისა და რეპრესიების სხვა ფორმების დოკუმენტირებას იწყებს და სავარაუდო ძალადობის მსხვერპლებს მიმართავენ, მიაწოდონ შესაბამისი მტკიცებულებები

სამოქალაქო ორგანიზაციების ნაწილი აცხადებს, რომ იწყებენ დანაშაულებისა და რეპრესიების სხვა ფორმების დოკუმენტირებას. ისინი მიმართავენ სავარაუდო ძალადობის მსხვერპლთ, მიაწოდონ მტკიცებულებები.

ახალგაზრდა იურისტთა ასოციაციაში ერთობლივი ბრიფინგი გაიმართა. საია-ს თავმჯდომარის განცხადებით, მტკიცებულებებს გამოიყენებენ როგორც დარღვევების მასშტაბის შესასწავლად, ასევე, გაეროსა და ადამიანის უფლებათა ევროპულ სასამართლოში საქმეების გასაგზავნად.

"მივმართავთ ყველა მსხვერპლს - ჩვენ ვართ თქვენ გვერდით. თქვენ მიერ მოწოდებული ინფორმაცია და თქვენი ვინაობა იქნება კონფიდენციალურად დამუშავებული თქვენი თანხმობის სრული გათვალისწინებით.

ეს მტკიცებულებები დაზარალებულების ინფორმირებული თანხმობით გამოყენებული იქნება სხვადასხვა მიზნით: დარღვევების მასშტაბის შესწავლა და პოტენციურად საქმეების მომზადება ადამიანის უფლებათა ევროპულ სასამართლოში საქმეების გასაგზავნად, გაეროს სახელშეკრულებო ორგანოებისთვის მისამართად და სისხლის სამართლის საერთაშორისო სასამართლოსთვის მიმართვისთვის," - განაცხადა საია-ს თავმჯდომარემ, ნონა ქურდოვანიძემ.