სააკაშვილის ხელისუფლების ყველაზე მთავარი პრობლემაა ის, რომ ყველაზე გავლენიანი მინისტრი  რუსული სპეცსამსახურების კონტროლის ქვეშ აღმოჩნდა - თეა თუთბერიძე ვანო მერაბიშვილზე

თეა თუთბერიძე

სამწუხაროდ ჩვენ აღმოვჩნდით მდგომარეობაში, როდესაც ყველაზე გავლენიანი მინისტრი ქვეყანაში, რომელიც ფაქტიურად მართავდა ყველა სამინისტროს, გარდა ერთი უწყებისა - თავდაცვის სამინისტროსი, აღმოჩნდა ან რუსული სპეცსამსახურების მართული, ან როგორც მინიმუმ, რუსულმა სპეცსამსახურებმა გამოიყენა ის, რასაც ის აკეთებდა საქართველოში - ამის შესახებ თეა თუთბერიძემ ტვ „ჯორჯიან თაიმსის“ ეთერში, შინაგან საქმეთა ყოფილ მინისტრ ვანო მერაბიშვილზე საუბრისას განაცხადა.

მისი თქმით, ვანო მერაბიშვილმა იცოდა და არა მხოლოდ იცოდა, ის უშუალოდ მონაწილეობდა მესხელის ხელით იმ ვიდეო სტუდიების მოწყობაში და იმ [ციხის] კადრების შექმნაში.

აქვე თუთბერიძე აღნიშნავს, რომ როდესაც იგი პრეზიდენტის უფლებამოსილი პირი იყო და შედიოდა დახურული ტიპის დაწესებულებებში, არ ახსენდება, რომ  მისი ციხეში შესვლა ვანო მერაბიშვილს გამოპარვოდა.

თეა თუთბერიძის თქმით, ამ მიმართულებით მუშაობს და ვანო მერაბიშვილს ამ საკითხთან დაკავშირებით ინტერვიუს შესთავაზებს.

„სამწუხაროდ ჩვენ აღმოვჩნდით მდგომარეობაში, როდესაც ყველაზე გავლენიანი მინისტრი ქვეყანაში, რომელიც ფაქტიურად მართავდა ყველა სამინისტროს, გარდა ერთი უწყებისა - თავდაცვის სამინისტროსი, ძალიან რთულია მტკიცებულებების გარეშე ამ ყველაფერზე საუბარი და მე აუცილებლად გავაგრძელებ მუშაობას ამ მიმართულებით და ამ წუთშიც ვმუშაობ, ერთერთი მიმართულება ალბათ ჩემი ეს არის, რომ აღმოჩნდა ან რუსული სპეცსამსახურების მართული, ან როგორც მინიმუმ, რუსულმა სპეცსამსახურებმა გამოიყენა ის, რასაც ის აკეთებდა საქართველოში. არ ვგულისხმობ  წარმატებულ პატრულის რეფორმას. დიახ, ვანო მერაბიშვილზე ვსაუბრობ და ჩვენ ახლა რამდენიც არ უნდა მოვიტყუოთ თავი, მე პირველივე დღეებიდან ვსვამდი შეკითხვებს სხვათა შორის, როდესაც ის კადრები, რომელიც გავრცელდა, ვგულისხმობ ციხის კადრებს, რომელიც ბიძინა ივანიშვილის ერთერთი მთავარი კოზირი აღმოჩნდა არჩევნების წინ 2012-ში. მე ვიყავი ადამიანი, რომელიც შედიოდა დახურული ტიპის დაწესებულებებში, ვიყავი პრეზიდენტის უფლებამოსილი პირი და არ მახსოვს არასოდეს, ჩემი ციხეში შესვლა ვანო მერაბიშვილს გამოპარვოდა. ის ურეკავდა ხოლმე გარკვეულ საერთო მეგობრებს, კვირაში რამდენი დღე და რამდენი საათი შეიძლება იყოს თეა ციხეში. ეს არ იყო მისი საქმე, მაგრამ ხუმრობით, ასე ვთქვათ. რისი თქმა მინდა, მან იცოდა და არა მხოლოდ იცოდა, ის უშუალოდ მონაწილეობდა მესხელის ხელით იმ ვიდეო სტუდიების მოწყობაში და იმ [ციხის] კადრების შექმნაში. ეს არის სერიოზული ბრალდება, მე ვარ ადამიანი, რომელიც შესთავაზებს ვანო მერაბიშვილს ამ საკითხთან დაკავშირებით ინტერვიუს ჩემი კვლევის ფარგლებში, იმიტომ, რომ ჩვენ თუ საბოლოოდ არ დავადგინეთ, რა მოხდა საქართველოში, ისე ცალსახად რომ ვილაპარაკოთ ახლა, რომ რუსეთის ინტერესები, რა თქმა უნდა რუსეთის ინტერესები საქართველოში კი არა, ამერიკაში საპრეზიდენტო არჩევნებში გამოიკვეთა და ამაზე საუბრობს მსოფლიო. რა თქმა უნდა, რუსეთის ინტერესები არის ძალიან ბევრ ქვეყანაში, იქნებოდა, იქნება და არის საქართველოში, მაგრამ ყველაზე მთავარი პრობლემა სააკაშვილის ხელისუფლების აღმოჩნდა ის, რომ ყველაზე გავლენიანი მინისტრი აღმოჩნდა რუსული სპეცსამსახურების კონტროლის ქვეშ. ეს არის ყველაზე დიდი პრობლემა, ეს არის საკითხი, რომელზეც მე აუცილებლად მექნება მცდელობა, ვანო მერაბოშვილისგან მივიღო პასუხები და ეს არის საკითხი, რომელზეც ჩვენ უნდა დავფიქრდეთ სამომავლოდ, ხვალ და ზეგ“ - განაცხადა თეა თუთბერიძემ.