სააკაშვილის აზრით, საპრეზიდენტო ბიბლიოთეკა არ არის ადგილი, სადაც პარტიის ბრიფინგები უნდა ტარდებოდეს

საქართველოს მესამე პრეზიდენტის დედის, გიული ალასანიას განცხადებით, მიხეილ სააკაშვილი თვლის, რომ საპრეზიდენტო ბიბლიოთეკა არ არის ადგილი, სადაც პარტიის ბრიფინგები უნდა ტარდებოდეს, რადგან ამისთვის ოფისები არსებობს.

მისივე თქმით, მიხეილ სააკაშვილი ოჯახის წევრებთან პოლიტიკურ თემებზე იშვიათად საუბრობს.

"მიხეილ სააკაშვილი ახლა საერთოდ არ ერევა პოლიტიკურ საკითხებში, ჩვენც არ გველაპარაკება. ჩემთან „ნაციონალურ მოძრაობაში" მიმდინარე პროცესებზე არ უსაუბრია. ერთადერთი აღნიშნა, რომ ბიბლიოთეკა არ არის ადგილი, სადაც უნდა იღებდნენ მსგავს გადაწყვეტილებებს, რადგანაც ამისთვის ოფისები არსებობს", - განაცხადა გიული ალასანიამ. 

შეგახსენებთ, „ნაციონალური მოძრაობის” ერთ-ერთმა ლიდერმა, ირაკლი ნადირაძემ პრეზიდენტის ბიბლიოთეკაში ბრიფინგი რამდენიმე დღის წინ გამართა.