ნუ გავუბრაზდებით... პატიმარი, რომელსაც ციხეში წინ აქვს რამდენიმე წელი სჭირდება გართობა და ხელი უნდა შევუწყოთ - წულუკიანი სააკაშვილის დავალებაზე

სააკაშვილის სცენარი ციხიდან - მას შემდეგ რაც ლევან ხაბეიშვილმა პარტიის გეგმებზე, ექსპრეზიდენტთან კონსულტაციების შემდეგ ისაუბრა, პოლიტიკური ოპონენტების მხრიდან მწვავე კრიტიკის ობიექტი გახდა. მმართველი გუნდი, „ნაციონალური მოძრაობის“ გეგმებს დესტაბილიზაციის მცდელობის სახელს არქმევს და ოპონენტებს რეგიონში არსებულ ისედაც რთულ ვითარებას ახსენებს.

კულტურის მინისტრის განცხადებით, საქართველოში რიგგარეშე არჩევნების ჩატარება არ იგეგმება, თუმცა მისი თქმით ექსპრეზიდენტს, რომელსაც ციხეში კიდევ რამდენიმე წლის გატარება მოუწევს სჭირდება, „გართობა“ და აჟიოტაჟი.

„როგორც ვიცი ციხეში არჩევნები არ ტარდება და არავის არ  ირჩევენ. შესაბამისად მას შეუძლია ნებისმიერი ტიპის კონსულტაციები გამართოს. საქართველოში რიგგარეშე არჩევნები არ იგეგმება, მაგრამ ნუ ვუწყენთ და ნუ გავუბრაზდებით იმიტომ, რომ პატიმარი, რომელსაც წინ აქვს რამდენიმე წელი ციხეში, რა თქმა უნდა, მას სჭირდება გარკვეული ანტურაჟი, მას სჭირდება გართობა და ამისათვის ყველამ ხელი უნდა შევუწყოთ. მაგრამ ვერავითარი პოლიტიკური არეულობის გამოწვევის რესურსი მას ვერ ექნება და უბრალოდ ვერ გააჩნია მით უმეტეს საპატიმროდან“, - აცხადებს თეა წულუკიანი.

ცნობისთვის, ლევან ხაბეიშვილის განცხადებით გეგმაზე, თუ როგორ უნდა მოხდეს ქვეყანაში ვადამდელი არჩევნების დანიშვნა, მსჯავრდებული ექსპრეზიდენტი, მიხეილ სააკაშვილი ხვალ, 20 აპრილის სასამართლო სხდომაზე ისაუბრებს.