ნდობის ჯგუფის სხდომაზე საქართველოს სახელმწიფო დაცვის სპეციალური სამსახურის უფროსს მოუსმინეს

პარლამენტის ნდობის ჯგუფის ფორმატში, ჯგუფის წევრებმა, საქართველოს სახელმწიფო დაცვის სპეციალური სამსახურის უფროსს, ანზორ ჩუბინიძეს მოუსმინეს. შეხვედრაზე სამსახურის ხელმძღვანელმა უწყების საქმიანობის 2024 წლის ანგარიში წარადგინა.

„ნდობის ჯგუფის სხდომაზე სახელმწიფო დაცვის სპეციალური სამსახურის ხელმძღვანელმა წარმოადგინა ინფორმაცია უწყების მიერ 2024 წელს განხორციელებული საქმიანობის შესახებ. შეხვედრაზე სამსახურის უფროსმა  ინსტიტუციური განვითარების პრიორიტეტებს გაუსვა ხაზი და ასევე, საიდუმლო შესყიდვების ნაწილში განხორციელებულ ღონისძიებებზე ისაუბრა. უნდა აღინიშნოს, რომ სახელმწიფო დაცვის სპეციალურ სამსახურს თანამედროვე სტანდარტების მატერიალურ-ტექნიკური ბაზა აქვს და ტრენინგებისა და სწავლებების შედეგად, უწყების თანამშრომლების გადამზადება და პროფესიული უნარების განვითარება პერიოდულად ხორციელდება. აღსანიშნავია, რომ ყოველწლიურად გაზრდილი სახელმწიფო დაფინანსების შედეგად, სამსახურის მდგრადობა და ინსტიტუციური განვითარება გრძელდება“, - განაცხადა ნდობის ჯგუფის ხელმძღვანელმა ალექსანდრე ტაბატაძემ.

ნდობის ჯგუფის სხდომას ჯგუფის წევრები - იურიდიულ საკითხთა კომიტეტის თავმჯდომარე არჩილ გორდულაძე, თავდაცვისა და უშიშროების კომიტეტის თავმჯდომარის პირველი მოადგილე თენგიზ შარმანაშვილი და პოლიტიკური ჯგუფის „ხალხის ძალის“ წევრი ვიქტორ ჯაფარიძე დაესწრნენ.