მიხეილ სააკაშვილს უნდა ეყოს ძალა, რომ "ნაცმოძრაობა" დაშლილად გამოაცხადოს - ეს არის გამოჯანმრთელების რეცეპტი - იაგო ხვიჩია

"მიხეილ სააკაშვილს უნდა ეყოს ძალა, რომ "ნაცმოძრაობა" დაშლილად გამოაცხადოს, ეს არის გამოჯანმრთელების რეცეპტი",-  ამის შესახებ “გირჩის" დეპუტატმა იაგო ხვიჩიამ ჟურნალისტებთან განაცხადა. 

"სააკაშვილის საზღვარგარეთ გადასაყვანად საჭიროა "ქართული ოცნების" პოლიტიკური ნება და ეს ნება რომ დადგეს, ამისთვის ყველაზე მოკლე გზა "ნაცმოძრაობის" დაშლაა. ჩემი აზრით, ეს პარტია მიხეილ სააკაშვილის საკუთრებაა. შესაბამისად, მისი გადასაწყვეტია მისი საკუთრების განკარგვასთან დაკავშირებული ნებისმიერი ღონისძიება, მათ შორის დაშლა.

აქედან გამომდინარე, მთავარი არ არის "ნაცმოძრაობის" დაშლა, მთავარია, მიხეილ სააკაშვილს ეყოს ძალა ასეთი გადაწყვეტილების მიღებისთვის. მიხეილ სააკაშვილის ჯანმრთელობისთვის უკიდურესად აუცილებელია არა "ვივამედში" გადაყვანა, არამედ "ნაციონალური მოძრაობის" დაშლა, ეს არის რეცეპტი. არ ვიცით, ყველა წამალი, საბოლოო ჯამში, განკურნავს თუ არა მას, მაგრამ სწორი წამლის დანიშვნა პირველი გზაა გამოჯანმრთელებისთვის. სწორი წამალი "ნაციონალური მოძრაობის" დაშლაა, ეს როგორ იმოქმედებს ვნახოთ, მაგრამ თუ წამალს არ დალევ, ისე ვერ გამოჯანმრთელდები,"- განაცხადა ხვიჩიამ.