უკრაინის საზღვაო ძალების წარმომადგენელი, რომელიც „აზოვსტალის“ ქარხანაში იმყოფება, ილონ მასკს მიმართავს

უკრაინის საზღვაო ძალების წარმომადგენელი სერგეი ვოლინა, რომელიც „აზოვსტალის“ ქარხანაში სხვა მებრძოლებთან ერთად იმყოფება, სოციალური ქსელის საშუალებით ილონ მასკს მიმართავს და ევაკუაციაში დახმარებას სთხოვს. ინფორმაციას BBC-ი ავრცელებს. 

„ამბობენ, რომ სხვა პლანეტიდან მოხვედი, რათა ასწავლო ხალხს ირწმუნონ შეუძლებელი. ჩვენი პლანეტები მეზობლადაა, რადგან ახლა ვცხოვრობ იქ, სადაც გადარჩენა შეუძლებელია. დაგვეხმარე, დავტოვოთ „აზოვსტალი“. თუ შენ არა, მაშინ ვინ? მომეცი მინიშნება“, -წერს ვოლინა.

ილონ მასკი ამ მიმართვას ჯერ არ გამოხმაურებია.

უკრაინული მედიის ინფორმაციით, „აზოვსტალის“ ქარხანაში 1 000-1 200-მდე მებრძოლი რჩება, რომელთა შორის ასობით დაჭრილი და დაშავებულია. ისინი ანტისანიტარიულ პირობებში, მედიკამენტების, საკვები და სასმელი წყლის დეფიციტში იმყოფებიან.