არცერთ ქართველს საქართველოსთან დაპირისპირება არ მოუგია - არჩილ თალაკვაძე

მინდა დავით არახამიას ვუთხრა, არც ერთ ქართველს საქართველოსთან დაპირისპირება არ მოუგია, - ამის შესახებ პარლამენტის ვიცესპიკერმა არჩილ თალაკვაძემ ჟურნალისტებთან განაცხადა.

მისი თქმით, დავით არახამიას განცხადებები არამეგობრულია და ის „ნაციონალური მოძრაობის“ ნარატივს იმეორებს.

„ვინაიდან, ჩვენი მეგობარი ქვეყანა, უკრაინა რუსეთთან ომში იმყოფება, მთელი ამ თვეების განმავლობაში თავს ვიკავებთ, რომ გავაკეთოთ ის შეფასებები კონკრეტულ პოლიტიკურ პირებთან მიმართებით უკრაინის ხელისუფლებაში, რომელსაც რეალურად იმსახურებენ. რაც შეეხება დავით არახამიას, მისი მხრიდან ეს არის საქართველოს მიმართ გაკეთებული არამეგობრული განცხადებები. როცა უკრაინაში ომია, ჩვენთვის გასაკვირია, რომ პოლიტიკოსები, მათ შორის, პარლამენტის მაღალი თანამდებობის პირები იცლიან, რომ საქართველოს შიდაპოლიტიკურ საქმეებში ჩაერიონ. მისი განცხადებები პირდაპირ იმეორებს საქართველოში „ნაციონალური მოძრაობის“ ნარატივს და მინდა მას ვუთხრა, არც ერთ ქართველს საქართველოსთან დაპირისპირება არ მოუგია. ასე რომ, კიდევ ერთხელ ჩვენი მხარდაჭერა უკრაინას, უკრაინელ ხალხს, უკრაინის ტერიტორიულ მთლიანობას და სუვერენიტეტს,“ - განაცხადა თალაკვაძემ.

ცნობისათვის, უკრაინის რადას ფრაქცია „ხალხის მსახურის“ თავმჯდომარე დავით არახამიამ საქართველოს მთავრობა 2008 წლის აგვისტოს ომის 14-წლის თავზე გაკეთებული განცხადებების გამო გააკრიტიკა. როგორც მან აღნიშნა, ელოდა, რომ საქართველოს ხელისუფლებას თავის ქვეყანასთან მიმართებაშიც არ ეყოფოდა გამბედაობა, აგრესორი გაეკიცხა.