ცეცხლის შეწყვეტა უპირობო უნდა იყოს და ამის შემდეგ, ნებისმიერ ფორმატში მოლაპარაკება შესაძლებელი იქნება - ვოლოდიმირ ზელენსკი

უკრაინის პრეზიდენტის, ვოლოდიმირ ზელენსკის განცხადებით, ცეცხლის შეწყვეტა უპირობო უნდა იყოს და ამის შემდეგ, ნებისმიერ ფორმატში მოლაპარაკება შესაძლებელი იქნება.

ზელენსკის განმარტებით, ევროპული ქვეყნების კოალიციის შედეგების შესაჯამებლად პირველი შეხვედრა გაიმართა და ძირითადი პუნქტების შეჯამების შემდეგ, ტექნიკური ჯგუფი აშშ-ში გაემგზავრება.

"დღეს, ჩვენ გვქონდა პირველი შეხვედრა ევროპული ქვეყნების კოალიციის შედეგების შესაჯამებლად. ეს იყო პირველი ეტაპი, ძალიან მნიშვნელოვანი შეხვედრა. პროცესში არა მხოლოდ სამი ქვეყანა — უკრაინა, საფრანგეთი და ბრიტანეთი მონაწილეობს, რომლებიც დღევანდელ შეხვედრაში მონაწილეობდნენ, არამედ ბევრი სხვა ქვეყანაცაა ჩართული შეთანხმებასა და მის ძირითად პუნქტებში, რის შემდეგაც ტექნიკური გუნდი მზად იქნება გაემგზავროს შეერთებულ შტატებში და დაიწყოს დიალოგი ამერიკელ პარტნიორებთან. ჩვენი ინფორმაციით, ამერიკა გარკვეულ ქმედებებზე მზადყოფნას გამოხატავს — ვნახოთ, მოხდება თუ არა ეს. ეს არ არის წინასწარმეტყველება, უბრალოდ ის ინფორმაციაა, რაც გვაქვს. რამდენად შეესაბამება ეს სინამდვილეს, მალე გამოჩნდება. მჯერა, რომ ამ ნაბიჯებს შეუძლია გავლენა მოახდინოს რუსებზე და ცეცხლის შეწყვეტაზე. ეს ყველასთვის მნიშვნელოვანია. ჩვენ მიგვაჩნია, რომ ცეცხლის შეწყვეტა უპირობო უნდა იყოს. ამის შემდეგ შეგვიძლია ნებისმიერ ფორმატში მოლაპარაკება. მაგრამ ამისთვის რუსებმა უნდა შეწყვიტონ ადამიანების კვლა და მზად იყვნენ დიპლომატიისთვის. ახლა ისინი უბრალოდ ეშმაკის როლში არიან — სხვაგვარად როგორ აღვწერო ? დღევანდელ თავდასხმით მათ ათეულობით ადამიანი მოკლეს", - განაცხადა ზელენსკიმ.