თბილისის საქალაქო სასამართლომ ბადრი ჯაფარიძეს აღკვეთის ღონისძიების სახით 50 000 ლარიანი გირაო შეუფარდა

თბილისის საქალაქო სასამართლომ „ლელო“-ს ერთ-ერთი ლიდერის, ბადრი ჯაფარიძის აღკვეთის ღონისძიების შეფარდებაზე იმსჯელა და სრულად დააკმაყოფილა ბრალდების მხარის შუამდგომლობა გირაოს სახით 50 ათასი ლარის ოდენობით შეფარდების თაობაზე.

ბადრი ჯაფარიძის განცხადებით, იგი გადაწყვეტილებას არ ეთანხმება და გაასაჩივრებს.

პროკურორ მარი მეშველიანის განმარტებით, მიმდინარეობს გამოძიება დროებითი საგამოძიებო კომისიის მოთხოვნის შეუსრულებლობის ფაქტზე და საქმეში არსებული მტკიცებულებებით, დასაბუთებული ვარაუდის სტანდარტით იკვეთება ბრალდებულის მიერ სს კოდექსის 349-ე მუხლით გათვალისწინებული ჩადენა.

მან აღნიშნა, რომ ბრალდების მხარე ითხოვდა გირაოს 50 000 ლარის ოდენობით დანატებითი ღონისძიებების გარეშე.

საქმე ეხება პარლამენტის დროებითი საგამოძიებო კომისიის კანონიერი მოთხოვნის შეუსრულებლობის ფაქტზე დაწყებულ გამოძიებას. აღნიშნული საქმის ფარგლებში ბრალდება უკვე წარდგენილი აქვს მამუკა ხაზარაძეს.