რუსეთს უკრაინის დაპყრობის და მისი ლიდერების მკვლელობის 10-დღიანი გეგმა ჰქონდა - კვლევა

რუსეთს უკრაინის დაპყრობის და მისი ლიდერების მკვლელობის 10-დღიანი გეგმა ჰქონდა. ამის შესახებ აღნიშნულია ბრიტანეთის „თავდაცვისა და უსაფრთხოების კვლევების გაერთიანებული სერვისების სამეფო ინსტიტუტის“ (RUSI) კვლევაში.

კვლევის თანახმად, რუსეთი უკრაინის ტერიტორიის ანექსიის დასრულებას მიმდინარე წლის აგვისტოსთვის გეგმავდა, გეგმების სრული მასშტაბები რუსეთის ოფიციალური პირების მხოლოდ მცირე ჯგუფმა იცოდა.

როგორც ანგარიშშია აღნიშნული, უკრაინაში შეჭრისა და ოკუპაციის გეგმა, შეჭრის დაწყებამდე რამდენიმე დღით ადრე, რუსეთის შეიარაღებული ძალების დანაყოფების უფროსების მოადგილეებმაც კი არ იცოდნენ, ხოლო ტაქტიკურმა სამხედრო ჯგუფებმა ბრძანება შეჭრამდე რამდენიმე საათით ადრე მიიღეს.

დოკუმენტებმა ასევე აჩვენა, რომ რუსეთი გეგმავდა უკრაინის ელექტროსადგურების, აეროდრომების, წყალმომარაგების, ცენტრალური ბანკისა და პარლამენტის ხელში ჩაგდებას. დოკუმენტებში ნათქვამია, რომ რუსეთის სპეცსამსახურებს დაევალათ უკრაინის ხელმძღვანელობის ლიკვიდაცია. უკრაინის სადაზვერვო სამსახურები ასევე მიიჩნევენ, რომ რუსეთი გეგმავდა ბელარუსის საჰაერო-სადესანტო დანაყოფების გამოყენებას რივნისა და ხმელნიცკის ატომური ელექტროსადგურების დასაკავებლად.

კვლევის თანახმად, რუსეთი გეგმავდა შეჭრას „მასიური სარაკეტო და საჰაერო თავდასხმით“ უკრაინის სამხედრო ობიექტებზე, ხოლო კრიტიკულ ინფრასტრუქტურაზე, როგორიცაა ელექტროსადგურები და რკინიგზა თავდასხმა არ იგეგმებოდა, რადგან უკრაინის ოკუპაციისთვის მნიშვნელოვანი საყრდენი უნდა ყოფილიყო.

ანგარიშში ასევე აღნიშნულია, რომ რუსეთი დროთა განმავლობაში გეგმავდა მასწავლებლებისა და სხვა ოფიციალური პირების რუსეთიდან ჩაყვანას „უკრაინელების ხელახალი განათლების“ დასაწყებად.