ქორწილი Zoom-ით - უკრაინაში იუსტიციის სამინისტრომ ომის დროს ქორწინება გააადვილა

უკრაინის იუსტიციის სამინისტრომ საომარი მდგომარეობის დროს ქორწინების პროცედურა გაამარტივა. ამიერიდან წყვილს ქორწინების გაფორმება Zoom-ის საშუალებითაც შეუძლიათ. ამის შესახებ იუსტიციის მინისტრის მოადგილემ ვალერია კოლომიეცმა განაცხადა.

„დღევანდელმა გარემოებებმა მიგვიყვანა იქამდე, რომ ადამიანებს ხანდახან არ აქვთ ლოდინის შესაძლებლობა, რადგან ჩვენ ყველანი აღმოვჩნდით ისეთ ვითარებაში, როცა არ ვიცით რა იქნება ხვალ და ამაღამაც კი, საღამომდე. ამიტომ, ახლა უკვე შესაძლებელია მიმართვა და ქორწინების ფორმალიზება ერთ დღეში, ვისაც სურვილი აქვს“, - განმარტა კოლომიეცმა.

ქორწინების რეგისტრაცია შეიძლება განხორციელდეს რეესტრის ნებისმიერ ორგანოში იმ ტერიტორიაზე, სადაც არ არის საომარი მოქმედებები. გარკვეულ პირობებში, ქორწინება შეიძლება დაარეგისტრირონ არა მხოლოდ რეესტრის სამსახურის თანამშრომლებმა, არამედ პოლიციამ და სამხედროებმაც.

„მათ შეუძლიათ მიმართონ მეთაურს და წარუდგინონ განცხადება, რომ სურთ დისტანციურად დაქორწინება. ამრიგად, თქვენ შეგიძლიათ დაარეგისტრიროთ ქორწინება მაშინაც კი, თუ ერთ-ერთი მეუღლე ფიზიკურად არ იმყოფება თქვენ გვერდით“, - თქვა კოლომიეცმა.

ომის დაწყებიდან დღემდე თითქმის 22 000 უკრაინელი წყვილი დაქორწინდა, რაც ჩვეულებრივზე მეტია. ეს განსაკუთრებით საომარი მდგომარეობის გამოა.

ამასთან, თუ ერთ-ერთი ახალდაქორწინებული ჯარისკაცია, მაშინ საომარი მდგომარეობის პერიოდში ქორწინების სახელმწიფო რეგისტრაცია შეიძლება განხორციელდეს მისი თანდასწრების გარეშე.