ბრძოლა გრძელდება, მადლობას ვუხდი თითოეულ ჯარისკაცს, სერჟანტსა და ოფიცერს - ვლადიმერ ზელენსკი

"დონეცკისთვის მძიმე ბრძოლა გრძელდება. ბრძოლა გრძელდება ბახმუტისა და სოლედარისთვის, კრემინასთვის, ჩვენი სახელმწიფოს აღმოსავლეთით მდებარე სხვა ქალაქებისა და სოფლებისთვის", - აცხადებს უკრაინის პრეზიდენტი ვლადიმერ ზელენსკი დღის ბოლოს გავრცელებულ ვიდეომიმართვაში.

"მადლობას ვუხდი თითოეულ ჯარისკაცს, სერჟანტსა და ოფიცერს, რომლებიც გაბედულად და მტკიცედ ასრულებენ დავალებებს! მადლობა "კრაკენის" ქვედანაყოფის მებრძოლებს გადამწყვეტი ქმედებებისთვის მტრის გასანადგურებლად სოლედარის რაიონში! მადლობა საერთაშორისო ლეგიონის ჯარისკაცებს და "შამანის" ქვედანაყოფს, რომლებიც მამაცურად იცავენ ბახმუტს!

სრულმასშტაბიანი ომის 324 დღე და როგორ შეიცვალა რუსეთისთვის ყველაფერი... უკვე ერთმანეთში უპირისპირდებიან, ვის უნდა მიეწეროს რაიმე ტაქტიკური წინსვლა. ეს მტრის წარუმატებლობის აშკარა სიგნალია. და ეს არის კიდევ ერთი სტიმული ყველა ჩვენგანისთვის, რომ მეტი ზეწოლა მოვახდინოთ ოკუპანტებზე და მეტი ზარალი მივაყენოთ მტერს.

მადლობა ყველას, ვინც ამას აკეთებს! როგორც ფრონტის ხაზზე, ასევე ჩვენს ყველა სხვა ფრონტზე.

ამიტომაც დღეს მინდა გამოვყო უკრაინის საგარეო დაზვერვის სამსახურის თანამშრომლები. ისინი, ვინც ჩვეულებრივ სრულიად ჩუმად მუშაობენ და ვისზეც ცოტას ლაპარაკობენ. მაგრამ მათ ნამდვილად მოაქვთ პარტნიორების ძალიან მნიშვნელოვანი გადაწყვეტილებები უკრაინისთვის, ჩვენი დამცველებისთვის. მადლობა ამისთვის!

მადლობას ვუხდი უკრაინის უშიშროების სამსახურის ყველა პერსონალს, რომლის შედეგებს საზოგადოება ხედავს ბრძოლაში, კერძოდ, კოლაბორანტებთან და დივერსანტებთან. მადლობა მათ ამისთვის!

მადლობა ყველას, ვინც ჩვენი ქვეყნის გამარჯვებისთვის მუშაობს! დიდება ჩვენს ჯარისკაცებს!

დიდება უკრაინას!", - აცხადებს ზელენსკი.