უკრაინა მზადაა, შორ მანძილზე მოქმედი სარაკეტო სისტემების მიღების შემთხვევაში, აშშ-სთან დარტყმის სამიზნეები შეათანხმოს - CNN

უკრაინის ხელისუფლება შეერთებულ შტატებს სთავაზობს, რომ იმ შემთხვევაში, თუ ამერიკისგან უფრო შორ მანძილზე მოქმედ რაკეტებს მიიღებენ, უკრაინული მხარე დარტყმის სამიზნეებს მათთან შეათანხმებს, - ინფორმაციას CNN-ი საკითხთან დაკავშირებით ინფორმირებულ წყაროებზე დაყრდნობით ავრცელებს.

საუბარია არმიის ტაქტიკურ სარაკეტო სისტემებზე ანუ ATACMS-ზე, რომლებსაც დაახლოებით 200 მილის (300 კილომეტრის) მანძილის დაფარვა შეუძლიათ, რაც დაახლოებით ოთხჯერ აღემატება იმ მანძილს, რომლის დაფარვაც აშშ-ის მიერ უკრაინისთვის გაგზავნილ მობილურ სარაკეტო სისტემებს, HIMARS-ებს შეუძლიათ.

უკრაინისგან თხოვნის მიუხედავად, ჯო ბაიდენის ადმინისტრაციას ATACMS-ის სარაკეტო სისტემების მიწოდება ჯერჯერობით არ დაუმტკიცებია. აშშ-ში აცხადებენ, რომ უკრაინა კარგად იყენებს HIMARS-ის სისტემებს. ასევე ადმინისტრაციაში არსებობს შეშფოთება იმასთან დაკავშირებით, რომ უფრო შორ მანძილზე მოქმედი ATACMS-ის იარაღის მიწოდება რუსეთმა, შესაძლოა, „წითელი ხაზის“ გადაკვეთად აღიქვას.