ნიკოლ ფაშინიანი: სომხეთსა და რუსეთს შორის ურთიერთობები სტაბილურად ვითარდება

რუსეთის პრეზიდენტი ვლადიმერ პუტინი სომხეთის პრემიერ-მინისტრ ნიკოლ ფაშინიანს შეხვდა.

ფაშიანიანმა მონაწილეობა მიიღო მოსკოვში მიმდინარე გლობალურ ატომურ ფორუმში, რომლის ფარგლებშიც რუსეთის პრეზიდენტს შეხვდა.

პუტინმა და ფაშინიანმა განიხილეს სომხეთის ატომური ელექტროსადგურის ფუნქციონირება, ასევე ორმხრივი ურთიერთობების სხვადასხვა ასპექტი.

შეხვედრის დროს პუტინმა აღნიშნა, რომ რუსეთსა და სომხეთს შორის ურთიერთობები „სტაბილურად და კარგად ვითარდება“.

„სავაჭრო ბრუნვა თითქმის 11 მილიარდ დოლარს შეადგენს, რაც რესპუბლიკის საგარეო ვაჭრობის 34%-ს შეადგენს. სომხეთის ვაჭრობა რუსეთთან, ჩვენი სტატისტიკის მიხედვით, 11,7 მილიარდ დოლარს შეადგენს, რაც რეკორდულად მაღალი მაჩვენებელია. ურთიერთობები ასევე ვითარდება ყველა სხვა სფეროში“, – განაცხადა პუტინმა და აღნიშნა, რომ სომხეთთან ყოველთვის ბევრი რამ არის განსახილველი.

თავის მხრივ, ფაშინიანმა მადლობა გადაუხადა ფორუმზე მიწვევისთვის და აღნიშნა, რომ სომხეთსა და რუსეთს შორის „ურთიერთობები სტაბილურად ვითარდება“.

„მართალია, წელს მცირედი კლება შეინიშნება და ეს გარკვეული გლობალური პროცესებით არის განპირობებული, მაგრამ მე მჯერა, რომ ამ საკითხზე შესაბამისი მუშაობაა საჭირო, რათა ჩვენმა ორმხრივმა ვაჭრობამ განაგრძოს ზრდა იმ ტემპით, როგორც 2023-2024 წლებში დავგეგმეთ“, – აღნიშნა ფაშინიანმა.