მეცნიერებმა ცხოველების მოძრაობების გლობალური კვლევა ჩაატარეს და მოულოდნელ დასკვნამდე მივიდნენ

მეცნიერები დიდი ხნის განმავლობაში თვლიდნენ, რომ მტაცებლები განურჩევლად დახეტიალობდნენ  ტერიტორიებზე. თუმცა, ამ თემაზე გლობალური კვლევის ჩატარების შემდეგ, მეცნიერებმა სიმართლე აღმოაჩინეს.

მათ დაადგინეს, რომ ბევრი მტაცებელი ფარულ მარშრუტებს მისდევს, ზოგი კი თავისუფლად დახეტიალობს. ამ დასკვნამდე ისინი მივიდნენ ექვს კონტინენტზე ათი წლის განმავლობაში 34 სახეობის 1239 მტაცებლის თვალყურის დევნების შემდეგ.

პუბლიკაციაში ნათქვამია, რომ GPS საყელოები აკონტროლებდა მათ მოძრაობებს, რამაც შექმნა მტაცებლების გადაადგილების შესახებ უდიდესი მონაცემთა ნაკრები. ამ მონაცემების შედარებამ ერთი განსხვავება გამოავლინა: ძაღლისებრი ცხოველები ერთსა და იმავე მარშრუტებს გაცილებით ხშირად იყენებენ, ვიდრე კატები.

„ჩვენ აღმოვაჩინეთ, რომ მტაცებელი სახეობები სივრცეს ფუნდამენტურად განსხვავებული გზებით იყენებენ. ძაღლისებრნი სივრცის გამოყენებისას გაცილებით უფრო სტრუქტურირებულები არიან. საშუალოდ, ისინი უფრო მეტად არიან დამოკიდებული სასურველ მარშრუტებზე, ვიდრე კატისებრი ცხოველები“, - განაცხადა მერილენდის უნივერსიტეტის ბიოლოგიის პროფესორმა.

მეცნიერებმა დაასკვნეს, რომ მგლები, მელა და კოიოტები თავიანთ ტერიტორიებზე ქმნიან ბილიკებს და ისევ და ისევ ბრუნდებიან იქ. ეს განმეორებადი მარშრუტები უხილავი მაგისტრალების როლს ასრულებს.

ამავდროულად, ლომები, ფოცხვერები და ლეოპარდები განსხვავებულად იქცევიან. მათი კვალი მიმოფანტულია მთელ ლანდშაფტზე იდენტური სტრუქტურის გარეშე.

ხაზგასმულია, რომ მეცნიერების აზრით, ამ მტაცებლებს შორის განსხვავება უბრალოდ ჩვევაზე უფრო ღრმაა. ძაღლისებრნი ნაცნობ მარშრუტებს ეყრდნობიან, კატისებრნი კი მოქნილობას ანიჭებენ უპირატესობას.

პუბლიკაციაში აღნიშნულია, რომ სტრუქტურირებული მარშრუტები ბევრ მტაცებელს აქვს, რაც მათ მოძრაობებს უფრო პროგნოზირებადს ხდის, ვიდრე აქამდე ეგონათ.