მარკო რუბიო აცხადებს, რომ რუსეთი და ჩინეთი ჩართული უნდა იყვნენ ბირთვული იარაღის კონტროლის შესახებ ნებისმიერ შეთანხმებაში

აშშ-ის სახელმწიფო მდივანმა, მარკო რუბიომ განაცხადა, რომ რუსეთი და ჩინეთი ჩართული უნდა იყვნენ ბირთვული იარაღის კონტროლის შესახებ ნებისმიერ შეთანხმებაში.

„ჩვენ ვფიქრობთ, რომ 21-ე საუკუნეში იარაღის კონტროლის შესახებ რეალური შეთანხმების მისაღწევად მასში ჩინეთი უნდა ჩაერთოს. მათი ბირთვული მარაგები მკვეთრად გაიზარდა, თუმცა ამტკიცებენ, რომ ისინი ჯერ კიდევ ჩამორჩებიან შეერთებულ შტატებსა და რუსეთს. ჩვენ ვფიქრობთ, რომ ეს ჩამორჩენა უმნიშვნელოა. მათ ნამდვილად აქვთ შესაძლებლობა, დაგვეწიონ და ამისკენ კარგად მიდიან. ამიტომ ჩვენ გვჯერა, პრეზიდენტი მტკიცედ არის დარწმუნებული, იმისთვის, რომ 21-ე საუკუნეში ნებისმიერი სახის ბირთვული შეთანხმება ლეგიტიმური იყოს, მასში უნდა მონაწილეობდეს ეს სამი ქვეყანა – შეერთებული შტატები, რუსეთი და ჩინეთი. ჩვენ გავაგრძელებთ მათი სურვილის შესწავლას ამის გასაკეთებლად. მათ საჯაროდ განაცხადეს, რომ არ სურთ ამის გაკეთება. ჩვენ გავაგრძელებთ ამ კუთხით ზეწოლას, რადგან ვფიქრობთ, რომ მსოფლიოსთვის კარგი იქნება, თუ ასეთ შეთანხმებას მივაღწევთ. პრეზიდენტი მხარს დაუჭერს ამას, თუ ჩვენ შევძლებთ ამის გაკეთებას“, – განაცხადა რუბიომ.