ილჰამ ალიევმა და ენდი ბარნემმა თავდაცვის სფეროში თანამშრომლობის გაძლიერებისა და შუა დერეფნის განვითარების ხელშეწყობის დეკლარაცია გააფორმეს

დიდი ბრიტანეთი და აზერბაიჯანი თავდაცვის, უსაფრთხოებისა და სატრანსპორტო ინფრასტრუქტურის სფეროებში თანამშრომლობის გაღრმავებაზე შეთანხმდნენ. შესაბამისი დებულებები სტრატეგიული პარტნიორობის შესახებ ერთობლივ დეკლარაციაშია ასახული, რომელიც ბრიტანეთის პრემიერ-მინისტრმა, ენდი ბარნემმა და აზერბაიჯანის პრეზიდენტმა, ილჰამ ალიევმა 12 ნოემბერს, დუბლინში მიიღეს.

დოკუმენტის თანახმად, მხარეები გააძლიერებენ თავდაცვის სფეროში თანამშრომლობას, მათ შორის სამხედრო პერსონალის მომზადების, თავდაცვითი შესაძლებლობების განვითარებისა და შეიარაღებული ძალების ურთიერთთავსებადობის მიმართულებით.

ლონდონი და ბაქო ასევე განიხილავენ სამხედრო მრეწველობაში თანამშრომლობის გაფართოებისა და ერთობლივი პროექტების განხორციელების შესაძლებლობებს.

სტრატეგიული პარტნიორობის ერთ-ერთი მნიშვნელოვანი მიმართულება შუა დერეფნის განვითარებაა.

დეკლარაციაში ნათქვამია, რომ დიდი ბრიტანეთი და აზერბაიჯანი მხარს დაუჭერენ შუა დერეფნის განვითარებას, აგრეთვე სატრანსპორტო, ლოგისტიკურ და ინფრასტრუქტურულ პროექტებს, რომლებიც ხელს შეუწყობს საერთაშორისო ვაჭრობისა და ინვესტიციების ზრდას.

დეკლარაციის მიხედვით, შუა დერეფნის განვითარება ბრიტანეთ-აზერბაიჯანის ერთობლივი სამთავრობათაშორისო კომისიის ერთ-ერთი პრიორიტეტი იქნება. სწორედ ეს კომისია განიხილება ინვესტიციების, ეკონომიკური დივერსიფიკაციის, სატრანსპორტო კავშირებისა და ენერგეტიკის სფეროში ერთობლივი ინიციატივების განხორციელების ძირითად პლატფორმად.

ცნობისთვის, შუა დერეფანი, იგივე ტრანსკასპიური საერთაშორისო სატრანსპორტო მარშრუტი, ჩინეთს ევროპასთან აკავშირებს ყაზახეთის, კასპიის ზღვის, აზერბაიჯანისა და საქართველოს გავლით. საქართველოდან ტვირთების გადაზიდვა შესაძლებელია როგორც თურქეთის მიმართულებით, ბაქო-თბილისი-ყარსის რკინიგზით, ისე შავი ზღვის პორტების გამოყენებით.

მარშრუტის სტრატეგიული მნიშვნელობა განსაკუთრებით გაიზარდა უკრაინაში რუსეთის სრულმასშტაბიანი შეჭრის შემდეგ, რადგან ის აზიასა და ევროპას შორის ტვირთების გადაზიდვის ალტერნატიულ გზას წარმოადგენს, რომელიც რუსეთის ტერიტორიას გვერდს უვლის.

მსოფლიო ბანკის შეფასებით, შუა დერეფნის პოტენციალის სრულად გამოყენებისთვის აუცილებელია სარკინიგზო ქსელის, პორტების, ლოგისტიკური ინფრასტრუქტურისა და საბაჟო პროცედურების გაუმჯობესება. ორგანიზაცია საქართველოს, აზერბაიჯანსა და ყაზახეთს მარშრუტის სამ ძირითად ქვეყნად განიხილავს.