Facebook-ი და Instagram-ი წაშლიან პოსტებს, რომლებიც ქალებს აბორტის გამომწვევ აბებზე წვდომას სთავაზობენ

Facebook-ი და Instagram-ი წაშლიან იმ მომხმარებელთა პოსტებს, რომლებიც ქალებს აბორტის გამომწვევ აბებზე წვდომას სთავაზობენ.  ინფორმაციას ამის შესახებ გამოცემა The Verge ავრცელებს. 

მას შემდეგ რაც აშშ-ის უზენაესმა სასამართლომ აბორტის კონსტიტუციური უფლება გააუქმა, სოციალურ ქსელებში მომრავლდა პოსტები, სადაც მომხმარებლები აბორტის გამომწვევი აბების გაგზავნას სთავაზობენ ქალებს, რომლებსაც ამ მედიკამენტებზე წვდომა მალე შეეზღუდებათ.

​Associated Press-ის მიერ ​გამოქვეყნებული ასეთი შინაარსის სატესტო პოსტი Facebook-მა 1 წუთში, ხოლო Verge-ის მიერ გამოქვეყნებული პოსტი 2 წუთში წაშალა.

კომპანია Meta-ს პრესმდივანმა ენდი სტოუნმა განაცხადა, სოციალურ ქსელებში „აკრძალულია ფარმაცევტული პროდუქციის შეძენა, გაყიდვა, ვაჭრობა, ჩუქება, მოთხოვნა ან შეძენის დაფინანსება“.