თამარ გონგაძე
ქედაში ავარიას ბავშვი ემსხვერპლა - ავტომობილი სიმაღლიდან გადავარდა
1728209100
„თენგიზი ხომ ძალიან სიმპათიური იყო, მაგრამ ნელიზე რომ იქორწინა, ამბობდნენ: ეს გოგო არჩვაძეს როგორ გაჰყვა ცოლადო“ - ლეგენდარული არსაკიძე 91 წლისაა
სახალხო არტისტი და მისი ბრწყინვალე თაობის ერთ-ერთი უკანასკნელი წარმომადგენელი - თენგიზ არჩვაძე 91 წლის გახდა.
მსახიობი შარშან პრეზიდენტმა ბრწყინვალების ორდენით დააჯილდოვა. სალომე ზურაბიშვილმა სახელმწიფო ჯილდო თენგიზ არჩვაძეს, ქართული თეატრალური და კინოხელოვნების განვითარებასა და პოპულარიზაციაში შეტანილი განსაკუთრებული წვლილისა და გამორჩეული საზოგადოებრივი მოღვაწეობისათვის მიანიჭა და ბრწყინვალების ორდენი პირადად გადასცა.
ვარსკვლავი, ხელოვნების ქურუმი, უბრალოდ ხალხის საყვარელი მსახიობი, ძალზე თავმდაბალია.
“…მე ის კაცი არა ვარ, ვინც გეგმებით ცხოვრობს. არასოდეს არაფერი დამიგეგმავს, მეზიზღებოდა დაგეგმილი ცხოვრება.
…პოპულარობა მტანჯავს. ქალაქში მცნობენ და ცდილობენ მასიამოვნონ. მე კი უკანმოუხედავად გავრბივარ. ადამიანურად, რა თქმა უნდა, სასიამოვნოა, მაგრამ პოპულარობა მაინც იაფფასიან ესტრადას ჰგავს.
…როლზე უარი ბევრი რამის გამო მითქვამს, მაგრამ ფინანსური ინტერესების გამო – არასოდეს.
…თუ დამიჯერებთ, ცხოვრებაში ფული არასოდეს დამითვლია” – ამონარიდები არჩვაძის ინტერვიუებიდან.
ანუკა ქებურია: – ბაბუ დილის ექვს-შვიდ საათზე იღვიძებს და ფეხზეა. ჩემი ვაჟი, ნიკოლოზი ერთადერთი ბიჭია ჩვენს ოჯახში და ბაბუ გიჟდება მასზე. თან თენგიზის ბაბუის სახელი ჰქვია. საგვარეულო ხმალი აჩუქა...
"პრაიმტაიმთან" მეგობარს იხსენებს ლეო ანთაძე.
ლეო ანთაძე: – ასეთი სუფთა და დადებითი ადამიანი, მე არ შემხვედრია. ახლო მეგობრებიდან მხოლოდ თენგიზი დამრჩა. ჩვენ სკოლის ასაკიდან ვმეგობრობთ. პიონერთა სასახლეში დრამატულ წრეზე ერთად დავდიოდით, ვმსახიობობდით. თეატრალურ ინსტიტუტში ერთ კურსზე ვსწავლობდით და ერთად დავამთავრეთ.
მაშინ მოდაში იყო რუსთაველის გამზირზე სეირნობა. საღამო არ გავიდოდა, ჩახუტებულებს არ გვესეირნა რუსთაველზე.
მთელი ცხოვრება მოგზაურობდა. ახალგაზრდობაში ტურისტული ლაშქრობის ინსპექტორად მუშაობდა. მოვლილი აქვს საქართველო, ჩრდილოეთ კავკასია. ბუნება ძალიან უყვარს.
ბრწყინვალე მსახიობია. აქვს უცნაური თვისება, არ უყვარს და თრგუნავს პოპულარობა. მისი ეს თვისება კიდევ უფრო მაყვარებს მას.
“დათა თუთაშხიაში” მუშნი ზარანდიას როლი ბრწყინვალედ აქვს შესრულებული. მომწონს არსაკიძის როლში, “კეთილ ადამიანებში”, “ხევსურულ ბალადაში”…
გარეგნობით არასდროს “უმარიაჟია”. უყვარდა კოხტად ჩაცმა. “შლიაპა” რამდენიმე ადამიანმა შემოიტანა თბილისში, მათ შორის თენგიზიც იყო. სტუდენტობის დროს პიჯაკში და ჰალსტუხში იყო გამოწკეპილი, “შლიაპა” ეხურა.
ზამთარში ბაკურიანში ერთად ვისვენებდით. მაშინ ღარიბები ვიყავით და ერთ საწოლში გვეძინა, ორ საწოლიანი ვერ ვიქირავეთ.
მეუღლის გარდაცვალების შემდეგ მოწყენილია. კარგი მეუღლე ჰყავდა. ულამაზესი იყო ნელი. თენგიზი ხომ ძალიან სიმპათიური იყო და სხვათა შორის, ნელი რომ თეატრში მოვიდა და მერე თენგიზზე იქორწინა, უფროსი თაობის მსახიობები ამბობდნენ, ეს გოგო როგორ გაჰყვა ცოლად თენგიზ არჩვაძესო.
სპექტაკლში “სამსახეობა რაინდისა” ნელი ფილიაშვილი დოდო ჭიჭინაძესთან ერთად თამაშობდა და ამბობდნენ, დოდოს გადაუჭოკრაო. ორივე ბრწყინავდნენ სცენაზე.
თენგიზი მექალთანე არ იყო, გოგოები ესეოდნენ, მოსწონდათ. მაგრამ ცოლის ერთგული გახლდათ ბოლომდე. მაგრამ თენგიზი თვითონ არ იჩენდა ინიციატივას.
ხშირად ვნახულობ, თუ ვერ ვნახავ, ვურეკავ ხოლმე. ჩვენს გარდაცვლილ მეგობრებს ვიხსენებთ ხოლმე.
თენგიზის ცუდი საქციელი მე არ გამიგია. არაფერი შეშლია.ძალიან მიყვარს. ის ისეთი პიროვნებაა, მთელ საქართველოს უყვარს.
ასევე დაგაინტერესებთ: რამდენი წელი გავიდა და… იმას, რასაც ახლა გეტყვით, ხშირად არ ვამბობ" - რას გვიმხელს იუბილარი მაცაცო სებისკვერაძე
სხვა სიახლეები
