"სულ მეგონა, რომ ეს ქართულ ლექსზე დაწერილი სიმღერა იყო" - ვინ არის ავტორი ჰიტისა "კაცი ვარ და ქუდი მხურავს"

"კაცი ვარ და ქუდი მხურავს" - "ორერას" რეპერტუარის ჰიტს, რომელსაც ქართველები ასე გულით ჰყვებოდნენ, ბევრს დღემდე ჰგონია, რომ ქართველი ავტორი ჰყავს.

"ცოლი მყავს და ნამუსი მაქვს,
არ დავუთმობ არავის,
რქებს ვერავინ ვერ დამადგამს,
არც დავადგამ არავის.

ფულს დავხარჯავ თუ მაქვს ჩემი,
არ ვუმადლი არავის,
არა მაქვს რა გასაცემი,
არც სესხსა ვთხოვ არავის.

მე არავის ვემონები,
არც ვბატონობ არავის,
მტერს შიშველი ხმალით ვხვდები,
ქედს არ ვუხრი არავის.

გავიხარებ, გავლაღდები,
არ ვიდარდებ არავის,
თუ არავის ვენაღვლები,
არც მე ვნაღვლობ არავის."

***

"სულ მეგონა, რომ ეს ქართული იყო; ქართულ ქარაგმას ჰგავს. ქართული სულისკვეთებაა, ვერც წარმოვიდგენდი, თუ უცხოური იქნებოდა. მე პეტრე გრუზინსკის მეგონა..." - სოციალურ ქსელში წერენ კომენტარებს.

ლექსი, რომელზედაც გოგი ცაბაძემ სიმღერა დაწერა, 60-იან წლებში სტუდენტმა გოგონამ, თამარ ერისთავმა შოტლანდიური პოეზიიდან თარგმნა. ლექსის ავტორი რობერტ ბერნსია.

პოეტი და მთარგმნელი თამარ ერისთავი

თამარ ლევანის ასულმა ერისთავმა 1956 წელს დაამთავრა თბილისის სახელმწიფო უნივერსიტეტის დასავლეთ ევროპის ენებისა და ლიტერატურის ფაკულტეტი. 1960–1973 წლებში მუშაობდა თბილისის ი. ჭავჭავაძის სახელობის სახელმწიფო პედაგოგიურ ინსტიტუტში ინგლისური ენის კათედრაზე. 1974–1993 წლებში ხელმძღვანელობდა მწერალთა კავშირთან არსებული მხატვრული თარგმანისა და ლიტერატურულ ურთიერთობათა მთავარი სარედაქციო კოლეგიის ახალგაზრდა მთარგმნელთა სექციას. მონაწილეობდა მსოფლიო ლიტერატურის ბიბლიოთეკის რედკოლეგიისა და შექსპირის სრული ქართული გამოცემის რედკოლეგიის მუშაობაში.

პირველი ლექსები გამოაქვეყნა 1954 წელს. პოეტურ კრებულთაგან აღსანიშნავია: „იარე მზეზე“ (1965), „იალკიალი“ (1981), „ვარსკვლავიანი ცის ქვეშ“ (1986).

თარგმნა და შეადგინა შოტლანდიური პოეზიის ანთოლოგია (1979), თარგმნა აგრეთვე რობერტ ბერნსის ლექსები (1959), „ლირიკა“ (1964), ჯ. ბაირონის, ჟაკ პრევერის, მ. ლერმონტოვის, ნიკოლაი ტიხონოვისა და სხვათა ნაწარმოებები. მისი ლექსები თარგმნილია სხვადასხვა ენაზე.

თამარ ერისთავი მარო მაყაშვილის დისშვილი იყო. მისი დიდი ბებია ეკატერინე გაბაშვილი გახლდათ. 

გარდაიცვალა 2014 წლის 8 იანვარს. დაკრძალულია დიდუბის პანთეონში.