რამდენჯერ გაიქცა და რა საქმეებში ფიგურირებს მინდია გორაძე - ქართველი კრიმინალური ავტორიტეტი დაკავებულია

მინდია

ქართველი ე.წ. კანონიერი ქურდი მინდია გორაძე ახლა საქართველოში ექსტრადირების მოლოდინშია. ლავას ოღლის სახელით ცნობილი კრიმინალური "ავტორიტეტი" ალბანეთის დედაქალაქში დააკავეს. სპეცოპერაცია კოდური სახელწოდებით "კრიესორი" ქალაქ ტირანას პოლიციამ ჩაატარა. საპოლიციო ღონისძიება ქართული მაფიის ლიდერის დაპატიმრებით დასრულდა. ფაქტს აქტიურად აშუქებს ალბანური მედია.

ინტერპოლის წითელი ცირკულარით ძებნილი მინდია გორაძე ქუთაისის საქალაქო სასამართლოში 2018 წელს დაუსწრებლად გაასამართლეს. საქართველოში მას 12 წლით თავისუფლების აღკვეთა აქვს მისჯილი.

ბათუმში, მინდია გორაძის ოჯახი ე.წ. კანონიერი ქურდის დაკავებაზე კომენტარს არ აკეთებს, საქართველოში ლავასოღლის მიმართ წარდგენილ ბრალდებებს აბსურდულ უწოდებს ადვოკატი ლექსო კობაიძე. ის კანონიერი ქურდის ინტერესებს 2018 წელს ქუთაისის სასამართლოში იცავდა.

მინდია გორაძის დაკავების მცდელობა რამდენიმე თვის წინ პოლონელ სამართალდამცველებსაც ჰქონდათ. ვარშავაში ჩატარებული სპეცოპერაციის დროს ლავასოღლის დაჯგუფების ოთხი წევრი დააკავეს, თავად კანონიერი ქურდმა კი გაქცევა მოახერხა.სპეცოპერაციას წინ ე.წ. ქურდული გარჩევაც უძღოდა სადაც კრიმინალური ავტორიტეტები ერთმანეთს ფიზიკურადაც გაუსწორდნენ.

42 წლის მინდია გორაძის სახელი საქართველოში არაერთ გახმაურებულ საქმეში ფიგურირებს. მათ შორის ბიზნესმენებისთვის ფულის გამოძალვის, ფიზიკური ანგარიშსწორებისა და ქურდული გარჩევების ამსახველ ფარულ ჩანაწერებში.

მინდია გორაძე ამჟამად ალბანეთის დედაქალაქში, საექსტრადიციო პატიმრობაში იმყოფება. საქართველოში ექსტრადაციის შემთხვევაში მას 12 წლიანი პატიმრობა ელის.