„ვცეკვავდი, ვმღეროდი... ვაკეთებდი, რაც სრულიად ლეგალურია“ - ფინეთის პრემიერ-მინისტრი

ფინურმა მედიამ გაავრცელა ვიდეოჩანაწერი, სადაც ფინეთის მთავრობის მეთაური, სხვადასხვა ცნობილ ადამიანებთან ერთად,   ერთობა.

ვიდეოში, რომელიც სოციალური მედიით გავრცელდა, ჩანს, რომ ფინეთის პრემიერ-მინისტრი სანა მარინი მათთან ერთად ცეკვავს. ფინური მედიის ცნობით, ჩანაწერში ისმის სიტყვა "კოკაინი".

ფინელი პარლამენტარების ნაწილმა მოითხოვა, რომ პრემიერ-მინისტრმა ნარკოტიკულ ნივთიერებაზე ტესტი გაიკეთოს და შედეგი გაასაჯაროოს.

დღეს გამართულ პრესკონფერენციაზე ფინეთის პრემიერ-მინისტრმა უარყო, რომ ნარკოტიკული საშუალება ჰქონდა მიღებული.

„მე ვცეკვავდი, ვმღეროდი, აღვნიშნავდი, ვაკეთებდი იმას, რაც სრულიად ლეგალურია“, – განაცხადა ფინეთის მთავრობის მეთაურმა.

ცნობისთვის, ფინეთის პრემიერ-მინისტრი, ღამის კლუბში ვიზიტის გამო, დეკემბერშიც გაეხვია სკანდალში, ის არ გადავიდა კარანტინში, როდესაც წვეულებაზე მყოფ მის კოლეგას კორონავირუსი დაუდასტურდა.