მიიღებს თუ არა ანასტასია გუბანოვა მოსკოვში დაგეგმილ შოუში მონაწილეობას - ფედერაციის განმარტება

6 თებერვალს გავრცელდა ინფორმაცია, რომ ქართველი სპორტსმენი ანასტასია გუბანოვა მოსკოვში გამართულ შოუში მიიღებს მონაწილეობას.

ინფორმაციას კატეგორიულად უარყოფს საქართველოს ფიგურული ციგურაობის ფედერაცია.

,,გვსურს გამოვეხმაუროთ ერთ-ერთ ვებგვერდზე გავრცელებულ ცრუ ინფორმაციას, თითქოს საქართველოს ფიგურული ციგურაობის ეროვნული ნაკრების წევრი ანასტასია გუბანოვა, რომელიც იანვარში ფინეთში გამართულ ევროპის ჩემპიონატზე საქართველოს სახელით ევროპის ჩემპიონი გახდა, მონაწილეობას აპირებს მოსკოვში, რუსეთის არმიის ცენტრალური სპორტული კლუბის არენაზე, 14 თებერვალს დაგეგმილ ფიგურული სრიალის ფესტივალში.

ანასტასია გუბანოვა, ისევე, როგორც საქართველოს ფიგურული ციგურაობის ეროვნული ნაკრების სხვა წევრები, ნებისმიერ ღონისძიებაში მონაწილეობენ მხოლოდ საქართველოს ფიგურული ციგურაობის ხელმძღვანელობასთან შეთანხმებით. საქართველოს ფიგურული ციგურაობის ფედერაციას ხსენებულ ღონისძიებაში ანასტასია გუბანოვას მონაწილეობის შესახებ გადაწყვეტილება არ მიუღია. ამიტომ სრული პასუხისმგებლობით ვაცხადებთ, რომ ჩვენი ნაკრების სპორტსმენი მოსკოვში დაგეგმილ შოუში მონაწილეობას არ იღებს. როგორც ჩანს, კონკრეტული ვებგვერდი ცდილობს, მცდარი ინფორმაციის გავრცელებით საზოგადოებას ეჭვი გაუჩინოს და მისი უკმაყოფილება გამოიწვიოს", - აღნიშნულია განცხადებაში.

ცნობისთვის, საქართველომ ისტორიაში პირველად ფიგურულ ციგურაობაში, ქალთა შორის ევროპის ჩემპიონატის ოქროს მედალი მოიპოვა. ანასტასია გუბანოვამ თავისუფალი პროგრამით ასპარეზობაში პირველი ადგილი დაიკავა.

სპორტსმენი 2021 წლიდან საქართველოს სახელით გამოდის.