„ლიონის“ მწვრთნელი მიქაუტაძეზე: დიდებულ ფორმაშია, ბევრი ვიმუშავეთ, რომ ასე ყოფილიყო

„ლიონის“ მთავარმა მწვრთნელმა პაულუ ფონსეკამ „სტრასბურთან“ მატჩის წინ პრესკონფერენცია გამართა.

სხვა თემებთან ერთად პორტუგალიელმა სპეციალისტმა გიორგი მიქაუტაძეზეც გააკეთა კომენტარი, რომელიც მაგარ ფორმაშია: ქართველმა ბოლო ოთხ მატჩში თავი 7 გოლით და 5 საგოლე პასით გამოიჩინა. ფონსეკას იმედი აქვს, რომ გიორგი ამ დინამიკას შეინარჩუნებს.

„ჟორჟი ამჟამად შესანიშნავ ფორმაშია. მან კარგად ითამაშა ეროვნულ ნაკრებში და მოტივირებული დაბრუნდა. ჩვენ ბევრი ვიმუშავეთ, რომ ის საუკეთესო მდგომარეობაში ჩაგვეყენებინა და მისთვის ეს კარგი დინამიკა უნდა შევინარჩუნოთ. სხვადასხვა პროფილის შემტევი გვყავს, რათა ისინი მატჩებს მოერგონ. ალექსანდრ ლაკაზეტმა ბოლო მატჩში კარგად ითამაშა, ჟორჟს სხვა თვისებები აქვს. ეს ჩემთვის აქტივია.

ამ მატჩში მხოლოდ მალიკ ფოფანა და საელ კუმბედი ვერ ითამაშებენ; ყველა სხვა მოთამაშე მზადაა. რამდენიმე ვარიანტი გვაქვს და მზად ვართ ხვალისთვის. მალიკს მუხლის პრობლემა აქვს, მას დრო დასჭირდება გამოჯანმრთელებისთვის. არასოდეს არ არის ადვილი, როცა ფეხბურთელები გვიან ბრუნდებიან საერთაშორისო მატჩიდან, მაგრამ მათ ველაპარაკე და ისინი მზად არიან სათამაშოდ. მათ იციან, რომ ეს მატჩი ჩვენთვის მნიშვნელოვანია. სასტარტო შემადგენლობა? მაქვს მკაფიო წარმოდგენა იმაზე, თუ როგორი მოთამაშეები დაგვჭირდება ხვალ. ჯერ კიდევ მაქვს ერთი-ორი ეჭვი, მაგრამ ვიცი, რისი გაკეთება მინდა.

ჩემი ფეხბურთელების ნდობა მაქვს და ველოდები, რომ იგივე მენტალიტეტს შეინარჩუნებენ. კარგად ვიმუშავეთ. ადვილი არ არის, როდესაც მოთამაშეები სხვადასხვა დროს ბრუნდებიან, მაგრამ მზად ვართ. ვმუშაობთ ყველა ტექნიკურ ასპექტზე, მაგრამ ასევე მოთამაშეების ინდივიდუალურ ხარისხზე, რადგან ბევრი მოთამაშე გვყავს, რომლებსაც შეუძლიათ ინიციატივის აღება.

„სტრასბური“ ერთ-ერთი საუკეთესო გუნდია ლიგა 1-ში. მათმა მწვრთნელმა შესანიშნავი სამუშაო გააკეთა თავის ახალგაზრდა ფეხბურთელებთან ერთად. მე ძალიან მსიამოვნებს მათი თამაშის ყურება. ეს იქნება რთული მატჩი ჩვენთვის, მაგრამ ასევე მათთვისაც.

ჩემპიონთა ლიგის საგზურის მოპოვება? მინდა, რომ ფეხბურთელები მომავალ მატჩზე კონცენტრირებულები დარჩნენ. ამ დროისთვის ჩვენი ერთადერთი მიზანი „სტრასბურია“. ჩვენ უნდა გავამახვილოთ ყურადღება იმაზე, თუ რა უნდა გავაკეთოთ ამ მატჩის მოსაგებად“, - განაცხადა ფონსეკამ.

შეგახსენებთ, გიორგი მიქაუტაძეს „ლიონის“ მაისურით ყველა ტურნირზე 37 მატჩში 13 გოლი აქვს გატანილი და 8-ჯერ საგოლე პასით გამოირჩა. კონკრეტულად ტურნირებზე გიორგის სტატისტიკა ასე ნაწილდება: ლიგა 1-ში 26 მატჩი, 7 გოლი და 4 საგოლე პასი, საფრანგეთის თასზე 2 მატჩი, 2 გოლი და ევროპა ლიგაზე 9 მატჩი, 4 გოლი და 4 საგოლე პასი.