როგორ ვუთხრათ სამძიმარი ერთი თვის მოყვანილ ცოლს?! დედაშენს რა ვუთხრათ… - შემზარავი ტრაგედია ლანჩხუთში

დილიდან ლანჩხუთის მუნიციპალიტეტის სოფელ აცანაში გლოვაა. გვიან ღამით ტრაგიკულად დაიღუპა სოფლის მკვიდრი გია ბოლქვაძე. ახალგაზრდა ავტოავარიას ემსხვერპლა. გარდაცვლილს ერთი თვის მოყვანილი მეუღლე დარჩა.

„სიტყვები არ მაქვს ამ ტრაგედიის გადმოსაცემად….
ჩვენი კუთხის და სოფლის ალალ-მართალო, კეთილო, უღალატო და მოსიყვარულე ობოლო ბიჭო…
ეს რა უბედურება დაგვატეხე თავს, ოთხი დის საფიცარო ძმაო?!
როგორ ვუთხრათ სამძიმარი ერთი თვის მოყვანილ ცოლს?!
ბიჭოოო, დედაშენს რა ვუთხრათ…
შენი გამზრდელი კუთხე, სამეგობრო და სამეზობლო ამ უბედურებამ გააოგნა…
ეს რა ქენი, შვილო”… წერს სოციალურ ქსელში ოჯახის ახლობელი.

„პრაიმტაიმი“ დამატებით დეტალებს არკვევს.

ცნობისთვის, შინაგან საქმეთა სამინისტროს ინფორმაციით, 2022 წლის განმავლობაში საქართველოში 7 517 საგზაო სატრანსპორტო შემთხვევა მოხდა, დაიღუპა 430, ხოლო დაშავდა 5 469 ადამიანი.

„2021 წლის განმავლობაში 7 705 საგზაო სატრანსპორტო შემთხვევა მოხდა (სსკ-ის 276-ე მუხლის მიხედვით), დაიღუპა 449, ხოლო დაშავდა 5863 ადამიანი. დედაქალაქში მოხდა 3 219 შემთხვევა, დაშავდა 2 674 ადამიანი, ხოლო დაიღუპა 56 პირი. 2022 წელს თბილისში, წინა წელთა შედარებით საგზაო შემთხვევების და დაშავებულთა ოდენობა შემცირებულია 6%-ით, ხოლო დაღუპვა გაზრდილია 8 %-ით", - აღნიშნულია გავრცელებულ ინფორმაციაში.

როგორც „საქართველოს ალიანსი უსაფრთხო გზებისთვის" თავმჯდომარე, ეკა ლალიაშვილი განმარტავს, საქართველოში 2022 წლის განმავლობაში წინა წლის იგივე პერიოდთან შედარებით საგზაო სატრანსპორტო შემთხვევები შემცირებულია 6%-ით, დაზიანებები 2 %-ით, ხოლო ლეტალობა 4 %-ით.