დარახველიძე

მიგრაციის საკითხთა სამთავრობო კომისიის 34-ე სხდომა გაიმართა

იუსტიციის სამინისტროში მიგრაციის საკითხთა სამთავრობო კომისიის 34-ე სხდომა გაიმართა, რომელსაც კომისიის თავმჯდომარე, იუსტიციის მინისტრი, პაატა სალია ხელმძღვანელობდა.იუსტიციის მინისტრმა ისაუბრა მიგრაციის საკითხთა სამთავრობო კომისიის ნაყოფიერ საქმიანობაზე, რომელმაც საფუძველი ჩაუყარა მიგრაციის სტრატეგიულ და კოორდინირებულ მართვას საქართველოში. ამ ჩარჩოში ხორციელდება 2021–2030 წლების მიგრაციის ეროვნული სტრატეგია, რომელიც „მიგრაციისა და განვითარების“ პრინციპს ეფუძნება და ხელს უწყობს საქართველოს ევროკავშირთან ინტეგრაციას. პაატა სალიამ ასევე აღნიშნა, რომ მიგრაციის საკითხები დღეს განსაკუთრებული აქტუალობით განიხილება საერთაშორისო დონეზე, მათ შორის, მიგრანტთა უფლებების დაცვის კუთხით, ხოლო კომისიის სხდომის მიგრანტთა საერთაშორისო დღესთან დამთხვევა სიმბოლურ მნიშვნელობას ატარებს.კომისიის წევრებმა სხდომაზე განიხილეს საქართველოს 2021-2030 წლების მიგრაციის სტრატეგიის განხორციელების პროგრესი და ერთხმად დაამტკიცეს სტრატეგიის 2026 წლის სამოქმედო გეგმა, რომელიც კომისიის წევრი უწყებების აქტიური მონაწილეობით შემუშავდა და მიზნად ისახავს მიგრაციული პროცესების ეფექტიან მართვას. გეგმა ფოკუსირებულია ლეგალური მიგრაციის ხელშეწყობაზე, არალეგალური მიგრაციის წინააღმდეგ ბრძოლასა და მიგრანტთა რეინტეგრაციაზე.კომისიის თანათავმჯდომარემ, შინაგან საქმეთა მინისტრის მოადგილემ, ალექსანდრე დარახველიძემ, ისაუბრა საერთაშორისო დაცვის ეროვნული სისტემის გაუმჯობესებისა და არალეგალური მიგრაციის პრევენციის მიზნით, 2025 წელს განხორციელებულ კომპლექსურ საკანონმდებლო ცვლილებებზე.სხდომაზე ასევე მოხსენებით წარსდგა, ჯანდაცვის მინისტრის მოადგილე, გიორგი ცაგარეიშვილი, რომელმაც შრომითი მიგრაციის მარეგულირებელი ის საკანონმდებლო ცვლილებები მიმოიხილა, რაც 2026 წლის გაზაფხულიდან ამოქმედდება. მანვე ისაუბრა საქართველოში დაბრუნებულ მიგრანტთა რეინტეგრაციის მიმართულებით დაგეგმილ და განხორციელებულ ღონისძიებებზე.სხდომა გაფართოებულ ფორმატში გაიმართა და მას სახელმწიფო უწყებებთან ერთად, ასევე ესწრებოდნენ კომისიაში საკონსულტაციო სტატუსის მქონე პარტნიორი საერთაშორისო ორგანიზაციებისა და სახალხო დამცველის აპარატის წარმომადგენლები.მიგრაციის საკითხთა სამთავრობო კომისია არის მთავრობის სათათბირო ორგანო, რომელიც მსჯელობს და გადაწყვეტილებებს იღებს მიგრაციის მართვასთან დაკავშირებულ სხვადასხვა აქტუალურ საკითხზე. ცხრა სახელმწიფო უწყებისგან შემდგარ კომისიას თავმჯდომარეობს იუსტიციის სამინისტრო.

სამართალი • 1765961692

უქმდება ყველანაირი საშეღავათო სისტემა იმ ადამიანებისთვის, ვინც საჭესთან ალკოჰოლური ზემოქმედების დროს იმყოფებოდა - ალექსანდრე დარახველიძე

სამწუხაროდ, ევროპაში პირველ ადგილზე ვართ გზებზე დაშავებულების და გარდაცვალების მაჩვენებლით, თუმცა საჭესთან ალკოჰოლის და ნარკოტიკების მოხმარებასთან დაკავშირებით უმკაცრესი პოლიტიკა გვაქვს, – ამის შესახებ საქართველოს შინაგან საქმეთა მინისტრის მოადგილემ, ალექსანდრე დარახველიძემ განაცხადა.მისი თქმით, ცვლილებები ამ პოლიტიკის გაგრძელებაა.„ცვლილებებით, უქმდება ყველანაირი საშეღავათო სისტემა იმ ადამიანებისთვის, ვინც საჭე ალკოჰოლური ზემოქმედების დროს მართა. ბევრ ადამიანს ჰქონდა მოლოდინი, მაგალითად, სამი თვის გასვლის შემდეგ მოითხოვდა და აღიდგენდა მართვის მოწმობას, ეს მექანიზმი აღარ იარსებებს. ასევე, ვისაც ამნისტიის საფუძველზე ეპატია, ისინი სრულად არ თავისუფლდებიან ადმინისტრაციული სახდელისგან. კერძოდ, ჯარიმა თუ აქვთ დაკისრებული, გადასახდელი ექნებათ. ასევე, ითვლებიან სახდელდადებულებად და ერთი წლის განმავლობაში განმეორებით თუ ჩაიდენენ იმავე ქმედებას, დაკვალიფიცირდება როგორც განმეორება და არა – როგორც პირველად ჩადენილი ქმედება. განმეორების შემთხვევაში კი უფრო მკაცრი სახდელებია“, – განაცხადა ალექსანდრე დარახველიძემ.მისი თქმით, სახელმწიფოს მკაცრი მიდგომა აქვს, ამ ადამიანებს შანსი მიეცათ, მაგრამ დანაშაულს თუ გაიმეორებენ, სახელმწიფო უმკაცრესი იქნება.„ამ ქმედებას მეორედ თუ ჩაიდენენ, დაისჯებიან განმეორებითი ჩადენისთვის, ბოლომდე მოუწევთ კანონით გათვალისწინებული სახდელის მოხდა“, – განაცხადა ალექსანდრე დარახველიძემ.

პოლიტიკა • 1765890351

პარლამენტმა პირველი მოსმენით მიიღო საკანონმდებლო ცვლილება, რომელიც ნარკოტიკული და სხვა აკრძალული ნივთიერებების უკანონო გადაადგილების აღკვეთის მექანიზმებს ეხება

პარლამენტმა 80 ხმით, პირველი მოსმენით, დაჩქარებული წესით მიიღო „საბაჟო კოდექსში“ ცვლილება, რომელიც ნარკოტიკული და სხვა აკრძალული ნივთიერებების უკანონო გადაადგილების აღკვეთის მექანიზმებს ეხება.როგორც მომხსენებელმა, შინაგან საქმეთა მინისტრის მოადგილე ალექსანდრე დარახველიძემ განაცხადა, ცვლილება ითვალისწინებს სასაზღვრო გამშვებ პუნქტებში, პორტებსა და აეროპორტებში, ასევე საფოსტო გზავნილებისთვის გათვალისწინებულ პუნქტებში, ცენტრალური კრიმინალური პოლიციის დეპარტამენტისა და საბაჟო დეპარტამენტის წარმომადგენლებისგან შემდგარი ერთობლივი ჯგუფების შექმნას.მისივე თქმით, აღნიშნული ჯგუფების მთავარი მიზანი იქნება ქვეყანაში შემომავალი და გამავალი ტვირთების კონტროლი და ყველა საეჭვო გზავნილისა თუ ტვირთის გადამოწმება.„გარდა ამისა, შეიქმნება ერთიანი ცენტრალიზებული სისტემა, სადაც დოკუმენტაციის საფუძველზე მოხდება საეჭვო ტვირთების წინასწარ შემოწმება. კანონში ცვლილების მიზანს წარმოადგენს შეიქმნას ტვირთების კონტროლის ეფექტური სისტემა იმისათვის, რომ საქართველო არ იყოს გამოყენებული ნარკოტიკებისა და სხვა უკანონო ნივთების ტრანზიტის ზონად“, - აღნიშნა ალექსანდრე დარახველიძემ.კანონპროექტი ასევე ითვალისწინებს სატრანსპორტო საშუალებებთან დაკავშირებული გარკვეული მომსახურებების საფასურების ზრდას. ცვლილებები ეხება მხოლოდ იმ შემთხვევებს, როდესაც სატრანსპორტო საშუალება საქართველოში დროებით გადასაადგილებლად არის შემოსული ან ქვეყნიდან ექსპორტზე/რეექსპორტზე გადის. იზრდება ტრანზიტული ნომრების გაცემის, საექსპერტო შემოწმების და შესაბამისი საბაჟო-ადმინისტრაციული დოკუმენტების მომზადების საფასურები.კანონპროექტის ინიციატორია საქართველოს მთავრობა, ავტორი კი - შინაგან საქმეთა სამინისტრო.

სამართალი • 1765884295

შსს-მ ე.წ. ქურდულ სამყაროსთან კავშირში მყოფი 49 პირი დააკავა, 14 კი დაუსწრებლად მისცა პასუხისგებაში, მათ შორის ხუთი ე.წ. კანონიერი ქურდი

შინაგან საქმეთა სამინისტროს თანამშრომლებმა, მთელი ქვეყნის მასშტაბით, ინტენსიურ რეჟიმში ჩატარებული საპოლიციო ღონისძიებების შედეგად, ე.წ. ქურდულ სამყაროსთან კავშირში მყოფი 63 პირი პასუხისგებაში მისცეს, დაკავებულია 49 პირი, ხოლო 14 პირი დაუსწრებლად იქნა პასუხისგებაში მიცემული, მათ შორის ხუთი ე.წ. ანონიერი ქურდია, – ამის შესახებ შინაგან საქმეთა მინისტრის მოადგილემ, ალექსანდრე დარახველიძემ ბრიფინგზე განაცხადა.მისივე თქმით, პასუხისგებაში მიცემულებს ბრალად ედებათ ე.წ. ქურდული სამყაროს წევრობა, „ქურდულ შეკრებაში მონაწილეობა“, „ქურდული სამყაროს საქმიანობის მხარდაჭერა“, „კანონიერი ქურდობა“ და „ქურდული სამყაროს წევრისთვის მიმართვა“.როგორც უწყებაში განაცხადეს, დაკავებულთა უმრავლესობა წარსულში სხვადასხვა მძიმე და განსაკუთრებით მძიმე დანაშაულისთვისაა ნასამართლევი.„შინაგან საქმეთა სამინისტროს თანამშრომლებმა აღნიშნული საპოლიციო ღონისძიება, მოსამართლის განჩინების საფუძველზე, ჩაატარეს.სამართალდამცველების მიერ, მოსამართლის განჩინების საფუძველზე ბოლო რამდენიმე თვის განმავლობაში განხორციელებული ფარული საგამოძიებო მოქმედებების შედეგად მოპოვებული მტკიცებულებებით დადგინდა, რომ ბრალდებულები კავშირზე იყვნენ საზღვარგარეთ მყოფ ე.წ კანონიერ ქურდებთან, ასრულებდნენ მათ დავალებებს და აქტიურად მონაწილეობდნენ „ქურდული სამყაროს” საქმიანობაში.ასევე, დგინდება, რომ ბრალდებულებისა და მოდავე მხარეების მონაწილეობით, სხვადასხვა დროს საქართველოში და საზღვარგარეთ ე.წ. ქურდული გარჩევები ეწყობოდა, რომლებშიც საზღვარგარეთ მყოფი „კანონიერი ქურდებიც“ მონაწილეობდნენ. ბრალდებულები შეკრებებზე ე.წ. ქურდული ტრადიციების შესაბამისად, გადაწყვეტილებებს იღებდნენ, ერთ-ერთ მოდავე მხარეს მეორის, ასევე, თავიანთ სასარგებლოდ განსაზღვრულ დროში გარკვეული თანხის გადახდას აკისრებდნენ. იმ შემთხვევაში, თუ ისინი არ დაემორჩილებოდნენ მათ მითითებებს, სიტყვიერ და ფიზიკურ შეურაცხყოფას აყენებდნენ. ასევე, ემუქრებოდნენ ოჯახის წევრების სიცოცხლის მოსპობით.პოლიციამ, ბრალდებულების პირადი და საცხოვრებელი სახლების ჩხრეკის შედეგად, ნივთმტკიცებად ამოიღო კომპიუტერული ტექნიკა და მობილური ტელეფონები, რომელთა საშუალებითაც ისინი ერთმანეთს და საზღვარგარეთ მყოფ „კანონიერ ქურდებს“ უკავშირდებოდნენ. გარდა ამისა, ჩხრეკის შედეგად, ამოღებულია ცეცხლსასროლი იარაღი.გამოძიება სისხლის სამართლის კოდექსის 223-ე პრიმა, 223-ე სეკუნდა, 223-ე ტერცია და 223-ე კვარტა მუხლებით მიმდინარეობს, რაც 15 წლამდე ვადით თავისუფლების აღკვეთას ითვალისწინებს.საქართველოს შინაგან საქმეთა სამინისტროსთვის ერთ-ერთ უმთავრეს პრიორიტეტს წარმოადგენს ორგანიზებულ დანაშაულთან, მათ შორის ე.წ. „ქურდულ სამყაროსთან“ დაკავშირებული დანაშაულებრივი საქმიანობის წინააღმდეგ სისტემური და შეურიგებელი ბრძოლა. კიდევ ერთხელ, ხაზგასმით ვაცხადებთ, რომ ნებისმიერი პირი, რომელიც ჩაიდენს დანაშაულებრივ ქმედებას, კანონის სრული სიმკაცრით დაისჯება. ჩვენი მთავარი მიზანია მაქსიმალურად უზრუნველვყოთ საზოგადოების უსაფრთხოება და დავიცვათ საქართველოს თითოეული მოქალაქე“, – განაცხადა დარახველიძემ.

სამართალი • 1765882897

LIVE: საგანგებო ბრიფინგი შინაგან საქმეთა სამინისტროში

პოლიტიკა • 1765872769

თავდაცვისა და უსაფრთხოების კომიტეტმა კანონპროექტებს და სარატიფიკაციო შეთანხმებას მხარი დაუჭირა

თავდაცვისა და უსაფრთხოების კომიტეტმა „საქართველოს სახელმწიფო უსაფრთხოების სამსახურის შესახებ“ კანონში ცვლილების შეტანის თაობაზე კანონპროექტი პირველი მოსმენით, პრინციპების დონეზე განიხილა. კანონპროექტის თანახმად, სახელმწიფო უსაფრთხოების სამსახურის კადრების მომზადებას, სახელმწიფო უსაფრთხოების აკადემია განახორციელებს. სახელმწიფო უსაფრთხოების უმაღლესი საგანმანათლებლო დაწესებულება სამაგისტრო პროგრამის და ასევე სათანადო სასწავლო კურსის ფარგლებში სტუდენტებისთვის სპეციალური პროფესიული ცოდნის შეძენას, შესაბამისი უნარ-ჩვევების გამომუშავებას და გადამზადებას უზრუნველყოფს. კანონპროექტი პარლამენტში დაჩქარებული წესით განიხილება. კომიტეტის სხდომაზე შინაგან საქმეთა მინისტრის მოადგილემ ალექსადრე დარახველიძემ „საქართველოს შინაგან საქმეთა სამინისტროსა და თურქეთის რესპუბლიკის ეროვნული თავდაცვის სამინისტროს შორის შინაგან საქმეთა სამინისტროს სახელმწიფო საქვეუწყებო დაწესებულება – საქართველოს სასაზღვრო პოლიციის სანაპირო დაცვის დეპარტამენტის მოსამსახურეების NATO-ს საზღვაო უსაფრთხოების ოპერაციაში „ზღვის მცველი“ მონაწილეობისას თურქეთის რესპუბლიკის საზღვაო ძალების ხომალდებზე განთავსებასთან დაკავშირებით“ ტექნიკური შეთანხმება წარადგინა. სარატიფიკაციო დოკუმენტი თურქეთის რესპუბლიკის საზღვაო ძალების სარდლობის მიერ საქართველოს სასაზღვრო პოლიციასთან კოორდინაციით მომზადდა. აღნიშნული დოკუმენტი NATO-ს საზღვაო უსაფრთხოების ოპერაციაში „ზღვის მცველი“ ჩართულ თურქეთის სამხედრო - საზღვაო ძალების ხომალდებზე ქართული კონტინგენტის განთავსების საფუძველს წარმოადგენს. მინისტრის მოადგილის განცხადებით, ანალოგიური შეთანხმება საქართველოს საბერძნეთის მხარესთანაც ჰქონდა გაფორმებული, რომლის ფარგლებში ქართულმა კონტინგენტმა საზღვაო უსაფრთხოების სწავლება ბერძნულ გემებზე გაიარა. ალექსანდრე დარახველიძემ კომიტეტის წევრებს გამარტივებული წესით განხილვისთვის მოთხოვნილი „სამოქალაქო უსაფრთხოების შესახებ“ საქართველოს კანონში ცვლილების შეტანის თაობაზე“ კანონპროექტიც გააცნო. კანონპროექტის თანახმად, „სამოქალაქო უსაფრთხოების შესახებ“ კანონის 441 მუხლით გათვალისწინებული საკითხების მარეგულირებელი სამართლებრივი აქტების მიღების ვადა 2026 წლის 1 იანვრის ნაცვლად, 2029 წლის 1 იანვრამდე გადაიწევს. სხდომაზე განხილულ საკითხებს კომიტეტის წევრებმა მხარი დაუჭირეს.

პოლიტიკა • 1765545840

ალექსანდრე დარახველიძე: იურიდიულ საკითხთა კომიტეტს წარვუდგინე შეთანხმების პროექტი, რაც ჩვენს სანაპირო დაცვას საშუალებას მისცემს, თურქეთთან ერთად ნატო-ს ფარგლებში წვრთნა გაიმართოს

ნატო-ს არაწევრი ქვეყნებიდან საქართველო პირველია, ვისაც საშუალება მიეცა, ნატო-ს წევრ ქვეყანასთან ერთად სწავლება განეხორციელებინა, – ამის შესახებ შინაგან საქმეთა მინისტრის მოადგილემ, ალექსანდრე დარახველიძემ განაცხადა.მისივე თქმით, საქართველოს მსგავსი შეთანხმება უკვე გაფორმებული აქვს საბერძნეთთან.„პარლამენტის იურიდიულ საკითხთა კომიტეტს შეთანხმების პროექტი წარვუდგინე, რომელიც ითვალისწინებს საქართველოსა და თურქეთის მხარეს შორის შეთანხმების გაფორმებას ნატო-ს ეგიდით, რაც ჩვენს სანაპირო დაცვას საშუალებას მისცემს, თურქულ მხარესთან ერთად ნატო-ს ფარგლებში შესაბამისი წვრთნა გამართოს.საქართველოს მსგავსი შეთანხმება უკვე გაფორმებული აქვს საბერძნეთთან. ნატო-ს არაწევრი ქვეყნებიდან საქართველო პირველია, ვისაც საშუალება მიეცა, ნატო-ს წევრ ქვეყანასთან ერთად მსგავსი სწავლება განეხორციელებინა. ვფიქრობ, ეს არის მნიშვნელოვანი სანაპირო დაცვისთვის, რომელიც თავსებადია ნატო-ს შესაბამისს სტანდარტებთან“, – განაცხადა დარახველიძემ.

სამართალი • 1765539826

ალექსანდრე დარახველიძე: სტრასბურგის სასამართლომ აღნიშნა, რომ პოლიციას აქვს ვალდებულება, იმოქმედოს იმ პროპორციული ძალის გამოყენების პრინციპით, რაც აუცილებელია საფრთხის აღმოსაფხვრელად

ადამიანის უფლებათა ევროპულმა სასამართლომ აღნიშნა, რომ ადგილი როდესაც აქვს მასობრივ არეულობას, ძალადობას, სახელმწიფო უწყებებზე შტურმს, პოლიციას აქვს ვალდებულება, იმ პროპორციული ძალის გამოყენების პრინციპით იმოქმედოს, რაც აუცილებელია საფრთხის აღმოსაფხვრელად, – ამის შესახებ საქართველოს შინაგან საქმეთა მინისტრის მოადგილემ, ალექსანდრე დარახველიძემ განაცხადა.„ადამიანის უფლებათა ევროპული სასამართლოს დიდმა პალატამ 19-20 ივნისის მოვლენებთან დაკავშირებით გადაწყვეტილება გამოიტანა და გარკვეულ შემთხვევაში კონკრეტული უფლებების დარღვევის ფაქტი დადგინდა. შესაბამისად, კონკრეტული განმარტებები გაკეთდა, რაში გამოიხატა უფლებების დარღვევის ფაქტი. მთავარი უნდა აღინიშნოს, რომ ადამიანის უფლებათა ევროპულმა სასამართლომ აღნიშნა, რომ ადგილი როდესაც აქვს მასობრივ არეულობას, ძალადობას, სახელმწიფო უწყებებზე შტურმს, პოლიციას აქვს უფლება, და არა მხოლოდ უფლება, არამედ ვალდებულება, იმ პროპორციული ძალის გამოყენების პრინციპით იმოქმედოს, რაც აუცილებელია საფრთხის აღმოსაფხვრელად. ამ შემთხვევაში ეს განმარტება პირდაპირ მითითებულია“, – აღნიშნა დარახველიძემ.მისივე თქმით, რაც შეეხება საკითხს, ვინ მიიღო გადაწყვეტილება ამა თუ იმ სპეცსაშუალებების გამოყენებაზე, ამაზე მიმდინარეობს პროკურატურაში გამოძიება.„რაც შეეხება კონკრეტულ შემთხვევაში კონკრეტული სპეცსაშუალებების გამოყენების, ასევე მათი არასწორი გამოყენების საკითხებს, ამაზე მსჯელობა არის გადაწყვეტილებაში. რა თქმა უნდა, თითოეული ჩვენგანი ყურადღებით ვეცნობით ამ გადაწყვეტილებას, კონკრეტული მითითებებია გაცემული. ეს საკითხები იქნება შესწავლილი და მოგვიანებით ამაზე იქნება მსჯელობა. რაც შეეხება იმას, ვინ მიიღო გადაწყვეტილება ამა თუ იმ სპეცსაშუალებების გამოყენებაზე, როგორც მოგეხსენებათ, საქართველოს გენერალურ პროკურატურაში ამაზე მიმდინარეობს გამოძიება. შესაბამისად, ჩვენ ვერ დავასწრებთ მოვლენებს და დაველოდოთ გამოძიების შედეგებს“, – განაცხადა ალექსანდრე დარახველიძემ.ადამიანის უფლებათა ევროპული სასამართლოს დიდმა პალატამ გამოაცხადა გადაწყვეტილება საქმეზე „ცაავა და სხვები საქართველოს წინააღმდეგ“, რომელიც 2019 წლის 20-21 ივნისის ღამით პოლიციის მიერ პარლამენტის წინ ანტისამთავრობო დემონსტრაციის დაშლას ეხება. 24 მომჩივანის მიმართ სტრასბურგის სასამართლომ დაადგინა ადამიანის უფლებათა ევროპული კონვენციის მე-3 მუხლის ორივე ასპექტის დარღვევა (არაადამიანური ან ღირსების შემლახველი მოპყრობა/ეფექტიანი გამოძიების ნაკლებობა). 14 მომჩივანთან დაკავშირებით სასამართლომ დაადგინა კონვენციის მე-10 მუხლის დარღვევა (გამოხატვის თავისუფლება). ასევე, სასამართლომ დაადგინა, რომ 11 მომჩივანის მიმართ დარღვეულ იქნა კონვენციის მე-11 მუხლი (შეკრების თავისუფლება).ცნობისთვის, საქართველოს მაშინდელი შინაგან საქმეთა მინისტრის და ყოფილი პრემიერის, გიორგი გახარიას მიმართ საქართველოს პროკურატურამ ორ საქმეზე დაიწყო სისხლისსამართლებრივი დევნა. ერთ-ერთი ეპიზოდი სწორედ 2019 წლის 20-21 ივნისის მოვლენებს უკავშირდება. გახარიას აღკვეთის ღონისძიების სახით პატიმრობა დაუსწრებლად აქვს შეფარდებული.

საზოგადოება • 1765452861

ინფრასტრუქტურის მინისტრმა წალენჯიხის მუნიციპალიტეტში მიმდინარე პროექტები მოინახულა

„დღეს წალენჯიხის მუნიციპალიტეტში დავათვალიერეთ ის ობიექტები, რომელთა შესახებაც წინასაარჩევნოდ მოსახლეობას მივეცით დაპირებები. ეს შეეხება როგორც საგზაო, ისე წყალმომარაგებისა და საგანმანათლებლო ინფრასტრუქტურულ პროექტებს. მუნიციპალიტეტში აქტიურად მიმდინარეობს წყალმომარაგების სამშენებლო სამუშაოები. ასევე, დავათვალიერეთ №1 საშუალო სკოლის ტერიტორია, რომელიც, სამწუხაროდ, დიდი ხანია რაც დანგრეულია. მოგეხსენებათ, რომ სამინისტრომ გამოაცხადა პროექტირებებზე კონკურსები. დღეს აქ ვიმყოფებით გამარჯვებულ არქიტექტურულ კომპანიასთან ერთად, რომელმაც პროექტირება უკვე დაიწყო. იმედი გვაქვს, რომ გაზაფხულიდან შევძლებთ სამშენებლო სამუშაოების დაწყებას“-ამის შესახებ ინფრასტრუქტურის მინისტრმა, რევაზ სოხაძემ სამეგრელოს რეგიონში მიმდინარე ინფრასტრუქტურული პროექტების დათვალიერების შემდეგ განაცხადა.მინისტრი წალენჯიხის მუნიციპალიტეტში საგზაო, წყალმომარაგებისა და საგანმანათლებლო-სოციალური ინფრასტრუქტურის მიმდინარე პროექტებს ადგილზე გაეცნო.სამუშაოები სხვადასხვა მიმართულებით აქტიურად მიმდინარეობს და მნიშვნელოვნად გააუმჯობესებს როგორც გადაადგილებას, ისე საჯარო სერვისებს.სამეგრელოში ინტენსიურად მიმდინარეობს შიდასახელმწიფოებრივი მნიშვნელობის წალენჯიხა–ობუჯი–ჯიხაშკარის გზის 7 კმ-მდე მონაკვეთის სრული რეაბილიტაცია, რომლის ღირებულება 12 მილიონ ლარზე მეტია. უკვე დაგეგმილია ამავე გზის მე-11 კმ-ზე, მდინარე ტორჩიაზე, 16.1-მეტრიანი ახალი ხიდის მშენებლობაც. შესაბამისი ხელშეკრულება გაფორმებულია და პროექტი სახელმწიფო ბიუჯეტიდან მილიონ ლარზე მეტით ფინანსდება.ინფრასტრუქტურის სამინისტროს გაერთიანებული წყალმომარაგების კომპანია ქალაქ წალენჯიხაში ახორციელებს წყალმომარაგების სისტემის მასშტაბურ რეაბილიტაციას. პროექტი მოიცავს სათავის, გამწმენდი ნაგებობის, მაგისტრალური მილების, რეზერვუარებისა და აღრიცხვის სისტემების მოწყობას, ასევე არსებული ინფრასტრუქტურის რეკონსტრუქციას. სამუშაოების 42% უკვე შესრულებულია. პროექტის დასრულების შემდეგ, 6300-მდე მომხმარებელი 24-საათიანი, უწყვეტი წყალმომარაგებით ისარგებლებს. მუნიციპალიტეტში სულ მიმდინარეობს ორი წყლის პროექტი, ჯამური -25,5 მილიონი ლარის ღირებულებით.მინისტრი ასევე გაეცნო სოფელ ობუჯში 50 ბავშვზე გათვლილი ბაღის მშენებლობის დასკვნით სამუშაოებს. საბავშვო ბაღში, თანამედროვე სტანდარტების შესაბამისად, მოეწყობა საგანმანათლებლო, სათამაშო და დასასვენებელი ზონები, სამზარეულო და სპორტული მოედანი. განახლებული შენობა სრულად იქნება ადაპტირებული სპეციალური საჭიროებების მქონე პირებისთვის. პროექტი სახელმწიფოს დაფინანსებით ხორციელდება და მისი ღირებულება 1.2 მლნ ლარია.მუნიციპალური განვითარების ფონდი იწყებს წალენჯიხის №1 საჯარო სკოლის ახალი, 600-მოსწავლიანი შენობის პროექტირებას. თანამედროვე მოდელი, რომელიც შემდგომში სხვა რეგიონებშიც იქნება გამოყენებული, მოიცავს მრავალფუნქციურ საგანმანათლებლო და სპორტულ სივრცეებს, ლაბორატორიებს, ბიბლიოთეკას და სრულად ადაპტირებულ ინფრასტრუქტურას.ინფრასტრუქტურის სამინისტრო განაგრძობს რეგიონებში სატრანსპორტო, წყალმომარაგების და საგანმანათლებლო ინფრასტრუქტურის განვითარებას, რაც მოსახლეობისთვის უსაფრთხო და კომფორტული გარემოს შექმნას ემსახურება.მიმდინარე სამუშაოებს ინფრასტრუქტურის მინისტრი რევაზ სოხაძე, საქართველოს პარლამენტის წევრებთან ირაკლი ზარქუასთან და ილია ინჯიასთან, საატომობილო გზების დეპარტამენტის თავმჯდომარე ლევან დარახველიძესთან, სამეგრელო-ზემო სვანეთის მხარეში სახელმწიფო რწმუნებულ დავით ვერავასთან და წალენჯიხის მუნიციპალიტეტის მერთან გუბაზ საჯაიასთან ერთად გაეცნო.

პოლიტიკა • 1765379454

პარლამენტმა პოლიციის აკადემიასთან დაკავშირებულ საკანონმდებლო ცვლილებებს მხარი დაუჭირა

საკანონმდებლო ორგანომ „პოლიციის შესახებ“ კანონში ცვლილებები მესამე მოსმენით მიიღო.საკითხი სხდომაზე შინაგან საქმეთა მინისტრის მოადგილემ ალექსანდრე დარახველიძემ წარადგინა.ცვლილების თანახმად, შინაგან საქმეთა სამინისტროს აკადემია უმაღლესი საგანმანათლებლო დაწესებულება გახდება და მისი სახელწოდება შეიცვლება საზოგადოებრივი უსაფრთხოებისა და პოლიციის აკადემიით (პოლიციის აკადემია).აგრეთვე, აკადემიაში ახალი საბაკალავრო პროგრამა „საზოგადოებრივი მართლწესრიგი და საპოლიციო საქმე“ შეიქმნება.ცვლილებებით, სახელმწიფო უსაფრთხოების სამსახურს სამაგისტრო პროგრამის განხორციელების შესაძლებლობა ეძლევა.

პოლიტიკა • 1765294371

პარლამენტმა „პოლიციის შესახებ“ კანონში ცვლილებას მხარი დაუჭირა

პარლამენტმა პირველი მოსმენით, დაჩქარებული წესით განიხილა და 79 ხმით მხარი დაუჭირა „პოლიციის შესახებ“ კანონში ცვლილებას. როგორც მომხსენებელმა, შინაგან საქმეთა მინისტრის მოადგილე ალექსანდრე დარახველიძემ აღნიშნა, პროექტის მიზანს წარმოადგენს აკადემიაში ახალი საბაკალავრო პროგრამის „საზოგადოებრივი მართლწესრიგი და საპოლიციო საქმე“ შექმნა.„ეს იქნება ახალი ფაკულტეტი, სადაც შესაძლებლობა გაჩნდება მომავალმა პოლიციელებმა უმაღლესი განათლება საპოლიციო საქმის მიმართულებით მიიღონ“, - განაცხადა მომხსენებელმა.ცვლილების თანახმად, შინაგან საქმეთა სამინისტროს აკადემია უმაღლესი საგანმანათლებლო დაწესებულება გახდება და მისი სახელწოდება შეიცვლება საზოგადოებრივი უსაფრთხოებისა და პოლიციის აკადემიით (პოლიციის აკადემია).კანონის ცვლილებაში აღნიშნულია პოლიციის აკადემიის უმაღლეს საგანმანათლებლო პროგრამაზე მიღებასთან, სწავლებასა და სტუდენტის სტატუსთან დაკავშირებული საკითხები.„ეს ცვლილებები იმის საშუალებას მოგვცემს, რომ მოვიზიდოთ ახალი, კვალიფიციური კადრები, რომლებსაც სათანადო ცოდნა და გამოცდილება ექნებათ. ჩვენ ვიღებთ პასუხისმგებლობას, სწავლის პერიოდში თითოეული სტუდენტი სრულად უზრუნველვყოთ კვებით, საცხოვრებლით, ფორმით, ტაქტიკური, ფიზიკური თუ საცეცხლე მომზადებით. სწავლის დასრულების შემდეგ სახელმწიფო მათი სისტემაში დასაქმების ვალდებულებას იღებს“, - განაცხადა ალექსანდრე დარახველიძემ.მისი განმარტებით, გაზიარებულია კომიტეტის სხდომაზე დეპუტატების მიერ გამოთქმული შეთავაზება, რომ წარმოდგენილ კანონპროექტთან ერთად სახელმწიფო უსაფრთხოების სამსახურისთვის ერთწლიანი სამაგისტრო პროგრამის შექმნის საკითხი განიხილონ.მისივე თქმით, სახელმწიფო უსაფრთხოების სამსახურის სახელი აკადემიით შეიცვლება.

სამართალი • 1765181700

ალექსანდრე დარახველიძე: სუსმა თავისი გამოძიების ფარგლებში ყველა კითხვას გასცა პასუხი, სპეკულაციები აქ აღარ არსებობს, დადასტურდა, რომ „ბიბისის“ გამოძიებაში მოცემული ფაქტები იყო მტკნარი სიცრუე

სახელმწიფო უსაფრთხოების სამსახურმა თავისი გამოძიების ფარგლებში ყველა კითხვას გასცა პასუხი, შესაბამისად, აქ უკვე სპეკულაციები აღარ არსებობს, – ამის შესახებ საქართველოს შინაგან საქმეთა მინისტრის მოადგილემ, ალექსანდრე დარახველიძემ განაცხადა.დარახველიძის თქმით, დადასტურდა, რომ „ბიბისის“ გამოძიებაში მოცემული ფაქტები იყო მტკნარი სიცრუე და საერთოდ არ შეიცავდა სიმართლეს.„როგორც უკვე არაერთხელ აღინიშნა, სახელმწიფო უსაფრთხოების სამსახურმა ჩაატარა სრულყოფილი და დეტალური გამოძიება. ჩატარდა 160-ზე მეტი საგამოძიებო მოქმედება, გამოიკითხა 90-მდე პირი, ჩატარდა ექსპერტიზები, გამოთხოვილია ყველა შესაბამისი რელევანტური დოკუმენტაცია, რაც აუცილებელი იყო ამ საქმის გამოძიებისთვის და დადგინდა, რომ შინაგან საქმეთა სამინისტრომ იმოქმედა კანონის შესაბამისად. არ დადასტურდა, თითქოს გამოყენებული იყო ნივთიერებები, რომლებიც აკრძალული იყო და შეიცავდა ნივთიერება „კამიტს“, რომელიც პირველი მსოფლიო ომის შემდეგ არის აკრძალული. სახელმწიფო უსაფრთხოების სამსახურმა თავისი გამოძიების ფარგლებში ყველა კითხვას გასცა პასუხი. შესაბამისად, აქ უკვე სპეკულაციები აღარ არსებობს. დადასტურდა, რომ „ბიბისის“ გამოძიებაში მოცემული ფაქტები იყო მტკნარი სიცრუე და საერთოდ არ შეიცავდა სიმართლეს“, – განაცხადა დარახველიძემ.სახელმწიფო უსაფრთხოების სამსახურმა გამოაქვეყნა დეტალური ინფორმაცია, სადაც შეგიძლიათ, გაეცნოთ ყველა იმ ნივთიერების შესახებ ინფორმაციას, რაც მითითებული იყო. გამოძიებაში დევს ყველა ის დოკუმენტი, რომელიც დაკავშირებულია აღნიშნული ნივთიერების შესყიდვასთან და მის ხარჯვასთან. შესაბამისად, სახელმწიფო უსაფრთხოების სამსახურმა გაავრცელა დეტალური ინფორმაცია იმ ნივთიერების შესახებ, რომელიც შეძენილი იყო 2007-2009 წლებში. ასე რომ, აქ კითხვები აღარ არის“, – განაცხადა ალექსანდრე დარახველიძემ.ცნობისთვის, „ბიბისიმ“ გამოაქვეყნა მასალა, სათაურით: „„ბიბისის“ მტკიცებულებების თანახმად, ქართველი დემონსტრანტების წინააღმდეგ პირველი მსოფლიო ომის დროინდელი ქიმიური ნივთიერება გამოიყენეს“. კერძოდ, „ბიბისი“ პირველი მსოფლიო ომის დროინდელი ქიმიური იარაღის სავარაუდო გამოყენებაზე საუბრობს. მედიასაშუალება წყაროდ ასახელებს პედიატრ კონსტანტინე ჩახუნაშვილს, განსაკუთრებულ დავალებათა დეპარტამენტის ყოფილ უფროსს, ლაშა შერგელაშვილს, ექსპერტ კრისტოფერ ჰოლშტეგეს. რესპონდენტები არიან აგრეთვე ეკა გიგაური და გიორგი ბაჩიაშვილი. „ბიბისის“ მასალაში ლაშა შერგელაშვილი აცხადებს, რომ, „მისი აზრით, ეს იგივე ნივთიერებაა, რომლის გამოცდაც მას წყლის ჭავლისთვის 2009 წელს სთხოვეს“. ამასთან, „ბიბისის“ ცნობით, „გამოძიების შედეგებს საქართველოს ხელისუფლებაში აბსურდული უწოდეს და განაცხადეს, რომ პოლიციამ კანონიერად იმოქმედა სასტიკი დამნაშავეების უკანონო ქმედებების საპასუხოდ“.სუს-ის ინფორმაციით, ნივთიერება „ბრომობენზილ ციანიდი“, იგივე „კამიტი“ საქართველოს შინაგან საქმეთა სამინისტროს არასდროს შეუძენია და 2024 წლის 4-5 დეკემბრის აქციაზე გამოყენებული ნივთიერებებიდან არცერთი არ განეკუთვნება აკრძალულ კატეგორიას.ამასთან, სუს-ში განაცხადეს, რომ „კამიტის“ გამოყენების გამოგონილი ფაქტის მიმართულებით საგამოძიებო მოქმედებები ამოწურულია, გამოძიება გრძელდება იმ შესაძლო დანაშაულზე, რაც უცხოეთის ორგანიზაციისთვის მტრულ საქმიანობაში დახმარებას გულისხმობს.