ვინ არის ქართველი ახალგაზრდა, რომელიც სასწავლო-სამუშაო პროგრამით „Meta”-ს შეუერთდება

ლუკა მუშკუდიანი 2022 წლის 12 მაისიდან 12- კვირიანი სასწავლო-სამუშაო პროგრამით უმსხვილეს საერთაშორისო ტექნოლოგიურ კორპორაციას „Meta” შეუერთდება. ინფორმაციას სკოლა-პანსიონი კომაროვი ავრცელებს.

მათივე ინფორმაციით, ლუკას ასევე აქვს საშუალება, აირჩიოს სასურველი მიმართულება და „მეტას” ტექნიკურ გუნდთან ერთად იმუშაოს.

„Meta” კორპორაცია მოიცავს ყველასთვის კარგად ნაცნობ სოციალურ ქსელებსა და პლატფორმებს: Facebook, Instagram, Whatsapp.

ლუკა მუშკუდიანი კომაროვის სკოლის დასრულების შემდეგ სწავლას Vanderbilt University-ში განაგრძობს კომპიუტერული მეცნიერებების მიმართულებით.

მას პროგრამაში მოხვედრა მიზნად ჰქონდა დასახული, რადგან მისი აზრით პროფესიული განვითარებისთვის უნივერსიტეტში მიღებული ცოდნის გარდა, პრაქტიკული გამოცდილებაც უმნიშვნელოვანესი კომპონენტია.

„მეტაში“ განაცხადის შეტანა დამსაქმებლისთვის პორტფოლიოს გაგზავნით დაიწყო. მალევე, კომპანიამ ტექნიკური ინტერვიუ დაუნიშნა, რომლის მიზანიც ლუკას შესაძლებლობების შემოწმება იყო. ამ ინტერვიუსთვის რამდენიმე კვირა ემზადებოდა, რამაც შედეგი გამოიღო და რამდენიმე გასაუბრების შემდეგ დადებითი პასუხი მიიღო.

ლუკა კომპანია “მეტას” სათაო ოფისში, კალიფორნიაში, 12-კვირიან სასწავლო-სამუშაო პროგრამას გაივლის და მისი მენტორი “მეტას” მაღალი პოზიციის გამოცდილი ინჟინერი იქნება. ლუკას ასევე საშუალება აქვს აირჩიოს სასურველი მიმართულება და “მეტას” ტექნიკურ გუნდთან ერთად იმუშაოს.

მეტაში მუშაობა დიდი გამოცდილებაა როგორც პროფესიული, ასევე პიროვნული ზრდის თვალსაზრისით. საინტერესო და კომპეტენტური გუნდი ლუკას დაეხმარება გაიღრმავოს ცოდნა ციფრული სამყაროს შესახებ და გაეცნოს როგორ მუშაობს მსოფლიოს უმსხვილესი სოციალური ქსელი.

კომაროვში სწავლის პერიოდში ლუკამ მათემატიკის წრეზე სიარული ადრევე დაიწყო, ხოლო მეათე კლასიდან საქართველოს მათემატიკის ნაკრების წევრი გახდა. მეთორმეტე კლასში კი საქართველოს ინფორმატიკის ნაკრებს შეუერთდა. ორივე მიმართულებით მოპოვებული აქვს საერთაშორისო ოლიმპიადის მედლები.

როგორც ლუკა იხსენებს საერთშორისო წარმატების მიღწევაში კომაროვის წრეებსა და მასწავლებლებს უდიდესი როლი მიუძღვით, ოლიმპიადებში მონაწილეობის გამოცდილებამ კი შემდგომი აკადემიური და პროფესიული წარმატება განაპირობა.

ტექნოლოგიებით დაინტერესებულ ადამიანებს, ლუკა ურჩევდა რომ დამოუკიდებლად (ინტერნეტიდან) ისწავლონ პროგრამირების სხვადასხვა სფერო, რადგანც თითქმის ყველა სფეროში მოთხოვნადია. ასევე მეგობრებს, კომაროვის ამჟამინდელ თუ მომავალ მოსწავლეებს საკუთარი გამოცდილებიდან ურჩევს, რომ დაისახონ მიზანი, რადგანაც თავდაუზოგავი შრომის შემთხვევაში განვითარება გარდაუვალია.

კომაროვის სკოლა ულოცავს ლუკა მუშკუდიანს წარმატებას და უსურვებს მრავალ საინტერესო გამოწვევასა და წინსვლას, “- ვკითხულობთ ინფორმაციაში.