თელავში 2 წლის წინ გაუჩინარებული ქალი, შესაძლოა, მოკლულია - რა ინფორმაცია აქვს მეზობელს

თელავის მუნიციპალიტეტის სოფელ შალაურში, 2020 წელს გაუჩინარებული ქალი, შესაძლოა მოკლეს.

68 წლის მზია ბედმანიკაშვილის ოჯახს ეჭვი მას შემდეგ გაუჩნდა, რაც მათ ახლობელმა სავარაუდო მკვლელობის შესახებ აცნობა.

ოჯახის წევრები ჰყვებიან, რომ ამავე სოფელში მცხოვრებმა ქალმა, გაუჩინარებული თანასოფლელის გარდაცვალების დეტალები ნაცნობებთან მოყვა.

ქალის მონაყოლის თანახმად, იგი დაკარგულ ბედმანიკაშვილს გზაზე შეხვდა, საკუთარ სახლში წაიყვანა და 3 დღით გამოკეტა. ბოლოს კი ის გარდაცვლილი ნახა, რის შემდეგაც, ეზოში, კაკლის ხის ქვეშ დამარხა.

ოჯახმა ბედმანიკაშვილის გარდაცვალების დეტალები სამართალდამცველებმა შეატყობინა.

ამ წუთებში ადგილზე სამხარაულის ბიუროს ექსპერტებს ელოდებიან. მითითებული ადგილი კი ყვითელი ლენტით არის შემოსაზღვრული.

ჩატარებული საგამოძიებო მოქმედებების შემდეგ, ექსპერტები დაადგენენ, შეესაბამება თუ არა, მონაყოლი სიმართლეს. სამართალდამცველებმა უკვე გამოკითხეს საქმესთან დაკავშირებული ყველა პირი.

შინაგან საქმეთა სამინისტროს ინფორმაციით, გამოძიება სისხლის სამართლის კოდექსის 115- ე მუხლით მიმდინარეობს და მისი გადაკვალიფიცირება გამოვლენილი გარემოებების მიხედვით მოხდება.