რატომ გვხვდება კვერცხში წითელი წერტილები?

რატომ გვხვდება კვერცხში წითელი წერტილები? - ამის შესახებ სოციალურ ქსელში სურსათის უვნებლობის სპეციალისტი ირაკლი არაბული წერს. 

„ალბათ ერთხელ მაინც გაგიტეხავთ კვერცხი და გულში შენიშნეთ პატარა წითელი წერტილი ან ლაქა. ამას თან მოჰყვება შეკითხვა — გაფუჭებულია? სახიფათოა? გადავაგდო? მოდი, ერთად გავარკვიოთ.

რა არის ეს წითელი წერტილი?

ეს წერტილი არ ნიშნავს, რომ კვერცხი განაყოფიერებულია ან რომ იქ უკვე ნაშიერი ვითარდებოდა. ეს უბრალოდ პატარა სისხლძარღვია, რომელიც კვერცხის ფორმირების დროს ქათამს დაეწყვიტა.

ასეთ ლაქებს უწოდებენ სისხლის ლაქებს (blood spots) და ისინი სრულიად ბუნებრივი მოვლენაა.

განაპირობებს ეს კვერცხის ხარისხს?

არა! კვერცხი ასეთ შემთხვევაშიც სრულად ვარგისია საკვებად — თუ არ აქვს დამახასიათებელი ცუდი სუნი, უცნაური ტექსტურა ან ფერი. სისხლის წერტილი შეიძლება ჩანგლით ან კოვზით მარტივად ამოიღოთ, თუ ვიზუალურად გაწუხებთ.

რის გამო ჩნდება ეს წერტილები?

სისხლის ლაქები ჩნდება კვერცხის ფორმირების პროცესში, როდესაც პატარა სისხლძარღვი იხლიჩება. ეს ხშირად ხდება ახალგაზრდა ქათმებში, ან სტრესულ გარემო პირობებში.

მნიშვნელოვანია ვიცოდეთ:• ეს ლაქა არ წარმოადგენს მიკრობულ საფრთხეს.• კვერცხის გადაგდება აუცილებელი არ არის.• ასეთი კვერცხი უსაფრთხოა მოხმარებისთვის.• თუ მაინც გეჩვენება საეჭვო — შენს ყნოსვას და დაკვირვებას ენდე“, - წერს ირაკლი არაბული.