„ორმოცი მოდის და არც მინდა ეს გავიაზრო... მისი ვიზიტი პირადულია...“ - ლევანის დედა სავარაუდო სტუმრების ვინაობას ასახელებს

30 ივლისს ლევან კბილაშვილის გარდაცვალებიდან ორმოცი დღე გადის. 31 წლის მომღერალი, 21 ივნისს მოსკოვში, სახლში ჯგუფის წევრებმა იპოვეს გარდაცვლილი. ექსპერტიზის დასკვნის თანახმად გარდაცვალებას მიზეზი ჰემორაგიული ინსულტია.

მომღერლის დედამ, მელიტა ფურცელაძემ პირველი ინტერვიუ "პრაიმტაიმს" მისცა, სადაც ლევანთან უკანასკნელ საუბარზე, მის გეგმებსა და მოულოდნელი გარდაცვალებით გამოწვეულ ტკივილზე საუბრობდა. ამჯერადაც მისგან ვიგებთ, რომ მომღერლის ორმოცზე ჩამოსვლას გეგმავს ემირ კუსტურიცასა და გორან ბრეგოვიჩის დირექტორი, ასევე მისი კოლეგები...

მელიტა ფურცელაძე: - ორმოცზე აპირებენ ჩამოსვლას, თუმცა დაზუსტებით არაფრის თქმა არ შემიძლია. ლუბა უსპენსკაიას, როგორც ვიცი, ბილეთები აქვს დაჯავშნილი. თუმცა დაზუსტებით ვერც მაგაზე გაგცემთ პასუხს. მისი ვიზიტი მისი პირადულია. სავარაუდოდ, მედიასთან კონტაქტს არ ისურვებს. არავის ეწყინოს. ბოდიშს ვიხდი. ამიტომ ვერ ვასაჯაროვებ ინფორმაციას. 

ვინც ლევანის დაკრძალვას არ დასწრებია, ჩამოდიან და მოდიან ყოველდღიურად. მე იმდენად ცუდად ვარ ორმოცის მოახლოებით, რომ სხვაზე ვერაფერზე ვფიქრობ. ჩემთვის ვარ ჩაკეტილი. სამ-ოთხჯერ მივდივარ საფლავზე. ფიზიკურად არ შემიძლია, ვერ ვუძლებ ამ ტკივილს. როგორ ვიცხოვრებ, არ ვიცი, ვერ გეტყვით.

თვალწინ მიდგას სულ, რასაც არ უნდა ვაკეთებდე. სიზმრად არ გამომცხადებია. ორმოცი მოდის და არც მინდა ეს გავიაზრო. ვისაც მოსვლა უნდა, მოვა...