„მეწვის სული, მეტი აღარ შემიძლია... სამი ადამიანი ერთად წავიდა, ორი დაბრუნდა სახლში და ჩემი შვილი გაქრა" - რას ყვება დაკარგული ბიჭის დედა

9 თებერვალს თბილისში 24 წლის გიგა დაუშვილი დაიკარგა და მას შემდეგ ახალგაზრდას ოჯახის წევრები და ძალოვნები უშედეგოდ ეძებენ. გიგა 9 თებერვალს გავიდა სახლიდან. როგორც მისი მეგობარი ამბობს, ბოლოს ისინი ერთად იყვნენ დიღმის ჭალებში. სწორედ იქ იპოვეს დაკარგული ბიჭის მობილური ტელეფონიც.

გიგა დაუშვილის დაკარგვაზე ინფორმაცია სოციალურ ქსელში მეორე დღიდან გაჩნდა, მის ძებნაში უბრალო ადამიანებიც ჩაერთვნენ და თუკი ვინმე მიამსგავსებდა გიგას ფოტოს ვინმეს ქუჩაში, დედას უკავშირდებოდნენ, მაგრამ სამწუხაროდ, ამ დრომდე რაიმე ხელჩასაჭიდი ვერ იპოვეს.

ნათია დაუშვილი, გიგას დედა „კვირის პალიტრასთან“ საუბრობს: 

- 9 თებერვლის შემდეგ უშედეგოდ ვეძებთ ჩემს შვილს. პოლიცია ცალკე ეძებს და პირველ რიგში მადლობა მაშველებს, რომლებიც მთელი გულით და თავგამოდებით ეძებენ.

გიგას დაკარგვიდან 5 დღის შემდეგ მაშველებმა შეწყვიტეს მისი ძებნა, დიდთოვლობის დროს მათ მოუწიათ დასავლეთ საქართველოში ხალხის დასახმარებლად წასვლა, 13 მარტს რომ ჩამოვიდნენ იქიდან, მას შემდეგაც თავდაუზოგავად ეძებდნენ ყველგან. მადლობა ღმერთს, წყალში ვერაფერი იპოვეს, იქნებ მოხდეს სასწაული და ჩემი შვილი ცოცხალი იპოვონ... მტკვარში რომ არ არის, იმედი მომეცა, იქნებ სადმეა, იქნებ ცოცხალია...

მაშველები რომ ეძებდნენ მეც იქ ვიყავი, დიღმის ჭალების ტერიტორიაზე და პოლიცია ამბობს, რომ არც ხმელეთზე და არც წყალში არ დარჩენილა ადგილი, რომელიც არ დათვალიერდა, მართლა მასშტაბური ძებნა იყო, მაგრამ ვერაფერი ხელჩასაჭიდი ვერ ვიპოვეთო. გამომძიებელს ყოველდღე ვურეკავ და მეუბნება, ახლა სხვადასხვა კუთხით ვაგრძელებთ ძიებასო, ჯერ არაფერია გარკვეული.

- ნათია, გვიამბეთ რა ვითარებაში დაიკარგა თქვენი შვილი?
- არ ვიცი, რა ვთქვა, გიგა ბოლოს როცა ვნახე, კარგ ხასიათზე იყო. იმ დღეს ლამპრობის დღესასწაულზე იყო მეგობრებთან ერთად. ამ დროს გადაღებული ვიდეოც გავრცელდა, სადაც ჩანს ჩემი შვილი. ვიცი, რომ გიგა ნასვამი იყო. მასთან ერთად ვინც იყო, იმ ბიჭმა მითხრა, ერთად დავლიეთ, 5 ჭიქა არაყი ექნებოდა დალეულიო.

გიგა ბევრს არ სვამდა არასოდეს, ამიტომ ეს საკმარისი იქნებოდა მისთვის, რომ დამთვრალიყო. მალე ეკიდებოდა სასმელი. როგორც ვიცი, ჩემი შვილი ლამპრობიდან გაიყვანა ჩვენმა ორმა მეზობელმა, ნიკა რ-მა და გიორგი ლ-მა. ისინი ფხიზლები იყვნენ. ეს სამი ადამიანი ერთად წავიდა, ორი დაბრუნდა სახლში და ჩემი შვილი გაქრა. განაგრძეთ კითხვა