გავიგე, რომ ჯგუფში არის ქალი, თურმე დედამისი დაეხმარა ბებიაჩემს ჩემს „მოცილებაში“ - თამუნა მუსერიძე

ტელეწამყვანი და ჯგუფის „ვეძებ“ დამფუძნებელი თამუნა მუსერიძე ამბობს, რომ მიაგნო ქალს, რომელმაც მისი დაბადების ისტორია იცის, თუმცა, არ ამხელს.

„გუშინ გავიგე, რომ ჯგუფში არის ქალბატონი, რომელმაც გადასარევად იცის ჩემი დაბადების ისტორია. იცის სად, როდის, რა ვითარებაში გავჩნდი. იცის ვინ არის ბიოლოგიური დედა. მეტიც, თურმე დედამისი დაეხმარა ეგრეთ წოდებულ ბებიაჩემს ჩემ „მოცილებაში“. იცის და დუმს! იცის და თურმე „პრობლემები“ არ უნდა. იცის და ალბათ ჰგონია, რომ სახლში მივუვარდები ვინმეს და ისტერიკას მოვაწყობ. იცის და პრობლემებს ერიდება. თუმცა ეს პრობლემა რაში მდგომარეობს ჯერ ვერ გავარკვიე. სამაგიეროდ გავიგე ამ ადამიანის ვინაობა და მეც ვერ ვიღებ ხმას. იმიტომ, რომ მე დებილი ისევ სხვას ვუფრთხილდები, რომ არ ეჩხუბონ.

მაგრამ! ხალხო მაგრამ!

ამ ჯგუფში სხვებიც ხართ, რომლებმაც გადასარევად იცით ამა თუ იმ ადამიანის წარმომავლობა, მშობლები, გენეტიკა და დუმხართ! შორიდან აკვირდებით, როგორ ეძებენ სასოწარკვეთილი შვილები დედებს. შორიდან უყურებთ, როგორ მოთქვამენ დედები მოპარული შვილების გამო.

იცით და ხმას არ იღებთ. ღმერთის არ გეშინიათ? თქვენი შვილების მომავლის არ გეშინიათ? თქვენი სიბერის არ გეშინიათ? ნუთუ არ იცით, როგორ დაამთავრეს გამყიდველმა გინეკოლოგებმა სიცოცხლე? ნუთუ არ იცით, როგორ აგეს მათმა შვილებმა მშობლების ცოდვების გამო პასუხი? ნუთუ არ იცით, რა ბედი ეწიათ გამშვილებლებს? ხმა ამოიღეთ! ხმა ამოიღეთ და ამოთქვით, სანამ დროა! სანამ დროა, თორემ ძალიან მალე გვიან იქნება! ცოდვა არავის შერჩენია და ნუ გგონიათ, რომ თქვენ გაიხარებთ! ხმა ამოიღეთ!“, - წერს მუსერიძე.

ასევე ნახეთ - თამუნა მუსერიძე და რუსკა ღალატზე