„გადავწყვიტეთ, უარი ვთქვათ გამოსაშვებ საღამოზე...”- სვანეთში დატრიალებულ ტრაგედიას სკოლა-გიმნაზია ეხმიანება

სვანეთის გზაზე რამდენიმე დღის წინ მომხდარ ტრაგედიას, წმინდა ილარიონ ქართველის სახელობის მესტიის მართლმადიდებლური სკოლა-გიმნაზია ეხმაურება.

სკოლა-გიმნაზია სოციალურ ქსელში სკოლის მეთორმეტე კლასის სახელით წერს, რომ სვანეთის გზაზე დატრიალებული ტრაგედიის გამო გადაწყდა, რომ უარი თქვან გამოსაშვებ საღამოზე:

„პოსტს ვდებთ ჩვენი სკოლის მეთორმეტეკლასელების სახელით!

დიდი გულისტკივილით ვიზიარებთ იმ ტრაგედიას, რომელიც ჩვენს რაიონში დატრიალდა, თანავუგრძნობთ გარდაცვლითა ოჯახებს, სკოლებს, მეგობრებს, ახლობლებს!

რა თქმა უნდა, პირველივე დღიდან გადავწყვიტეთ, რომ უარი ვთქვათ გამოსაშვებ საღამოზე და მცირედი პატივი მაინც მივაგოთ ჩვენი გარდაცვლილი თანატოლების ხსოვნას!

უფალმა დაგიმკვიდროთ ცათა სასუფეველი-ეკა, საბა, გიორგი!

მუდამ ჩვენს გულებში!

გიმნაზიის მეთორმეტე კლასი!”- ნათქვამია წერილში.

ცნობისთვის, სვანეთში, მდინარე ნაკრასში დაკარგული მესამე მოზარდის ცხედარი იპოვეს. მაშველებმა მე-12 კლასის მოსწავლის, საბა გვარმიანის ცხედარს მდინარე ენგურში მიაგნეს.

მდინარე ნაკრაში, პატარა ჰესის მიმდებარედ, დღეს დილით აღმოაჩინეს 14 წლის გიორგი ვიბლიანის ცხედარიც.

სამივე მოზარდი, სოფელ ჭუბერიდან, მაისობის დღესასწაულიდან, ნაკრაში ბრუნდებოდა, რა დროსაც ავტომობილი წვიმაში, სავარაუდოდ, მოსრიალდა და მდინარეში გადავარდა.