„ენდეთ მეცნიერებას და არა მე-16 საუკუნის გამონათქვამებს და მიდგომებს“ - ექიმი ვირუსულ ინფექციებზე მოსახლეობას აფრთხილებს

უნდა მივიღოთ თუ არა „სიცხის დამწევი“ პრეპარატები ვირუსული ინფექციის დროს - ამ თემაზე ვრცელ პოსტს ექიმი, mkurnali.ge-ს რედაქტორი თამარ მამაცაშვილი აქვეყნებს და ცდილობს, მაღალ სიცხესთან დაკავშირებული, სოციალურ ქსელებში პოპულარული მითები გააქარწყლოს.

"სოციალურ ქსელებში ხშირად ვრცელდება მოწოდებები, მათ შორის ექიმებისგანაც, რომ მაღალი ტემპერატურა თურმე ორგანიზმისთვის სასარგებლო რეაქციაა და არავითარ შემთხვევაში არ უნდა მივიღოთ სიცხის დამწევი წამლები.

გავრცელებული მოსაზრება, თითქოს 42°C ტემპერატურა ადამიანისთვის საშიში არ არის, სიცოცხლისთვის სახიფათო დეზინფორმაციაა.

სიმართლე კი ის არის, რომ 41°C-ზე ზემოთ იწყება ჰიპერპირექსია (სხეულის გადახურება), ხოლო 42°C-ზე ორგანიზმში არსებული ცილები განიცდიან დენატურაციას (სტრუქტურულ დაშლას). ეს შეუქცევადი პროცესია და იწვევს ორგანოების უკმარისობასა და ტვინის დაზიანებას.

მითი, რომ სიცხე "ვირუსებს წვავს" არასწორია: სიცხე ვირუსს კი არ "წვავს", არამედ ქმნის არახელსაყრელ გარემოს მისი გამრავლებისთვის და ააქტიურებს იმუნურ უჯრედებს. თუმცა, ზედმეტად მაღალი სიცხე თავად იმუნურ სისტემასაც ფიტავს.

უნდა ვიცოდეთ, რომ არასტეროიდების (მაგალითად, იბუპროფენის) მიღების მიზანი მხოლოდ ტემპერატურის დაწევა არ არის. მას აქვს ანთების საწინააღმდეგო და ტკივილგამაყუჩებელი ეფექტიც.
 
როდის შეიძლება, თავი შევიკავოთ წამლისგან? (როდის არ მივიღოთ)

თუ პაციენტი არის მხნედ, სვამს სითხეს და სიცხე არ აღემატება 38.0-38.5°C-ს, წამლის მიცემა აუცილებელი არ არის.

ამ დროს კანკალი (კუნთების მუშაობა ტემპერატურის ასაწევად) ფიზიოლოგიური პროცესია.
თუ დისკომფორტი მინიმალურია, ორგანიზმს მართლაც სჭირდება ეს დრო ვირუსის ამოსაცნობად და ანტისხეულების გამოსამუშავებლად.
 
როდის არის წამლის მიღება სავალდებულო? (როდის უნდა მივიღოთ)

ლოდინი დაუშვებელია და ტემპერატურა აუცილებლად უნდა დაიწიოს შემდეგ შემთხვევებში:
თუ ტემპერატურა 38.5-39.0°C-ზე მაღალია: ასეთ დროს ორგანიზმის ენერგოდანახარჯი და გულზე დატვირთვა იმდენად დიდია, რომ ის აზიანებს პაციენტს.

თუ არსებობს გაუწყლოების რისკი: თუ პაციენტი ვერ სვამს წყალს, მაღალი სიცხე მდგომარეობას კატასტროფულად ამძიმებს.

თუ პაციენტს აქვს ქრონიკული დაავადებები: გულის, ფილტვის ან ნევროლოგიური პრობლემების (მაგ. კრუნჩხვებისკენ მიდრეკილება) დროს.

როცა პაციენტს აქვს მკვეთრად გამოხატული სიმპტომები, თუნდაც სიცხე დაბალი იყოს: თუ პაციენტს აქვს 37.8°C, მაგრამ აქვს აუტანელი თავის ტკივილი ან ღებინება, წამლის მიღება ჰუმანური და აუცილებელი ნაბიჯია.

როდის არის დაუშვებელი თვითმკურნალობა?
თუ სიცხესთან ერთად შენიშნავთ შემდეგ ნიშნებს, სასწრაფოდ მიმართეთ ექიმს:

კისრის რიგიდობა: ნიკაპის მკერდზე მიტანის შეუძლებლობა.
გამონაყარი: რომელიც ხელის დაჭერისას არ ფერმკრთალდება (წერტილოვანი სისხლჩაქცევები).
სუნთქვის გაძნელება ან ძლიერი ქოშინი.
ცნობიერების დაბინდვა ან პაციენტის მომატებული ძილიანობა.

ენდეთ მეცნიერებას და არა მე-16 საუკუნის გამონათქვამებს და მიდგომებს. სიცხე იმუნიტეტის იარაღია, მაგრამ თუ ეს იარაღი პაციენტს აზიანებს, მისი მართვა თანამედროვე მედიკამენტებით აუცილებელია. 

უსაფრთხოების წესები

არ გამოიყენოთ ასპირინი ბავშვებში: ვირუსის დროს მან შეიძლება გამოიწვიოს სიცოცხლისთვის საშიში "რეის სინდრომი".

ჰიდრატაცია უმთავრესია: არცერთი წამალი არ იმუშავებს ეფექტურად, თუ ორგანიზმი გაუწყლოებულია. სვით ბევრი წყალი და ელექტროლიტები.

ნუ შეფუთავთ პაციენტს: ზედმეტი საბნები ხელს უშლის სითბოს გაცემას და ხელოვნურად ზრდის შინაგან ტემპერატურას.