დეკანოზი გიორგი ბერაძე: კარგი წესია, როდესაც მივდივართ და მიცვალებულებს ვულოცავთ მთავარ დღესასწაულს, უფლის აღდგომას. ყველა სასაფლაოზე იკურთხება საფლავები

აღდგომიდან ერთი კვირის განმავლობაში არის ზეიმი. ვულოცავთ ერთმანეთს და ჩვენს მიცვალებულებსაც აღდგომის ბრწყინვალე დღესასწაულს, - განაცხადა დეკანოზმა გიორგი ბერაძემ.

მისივე თქმით, მიცვალებულთა ხსენება არის თომას სამშაბათს, ანუ ერთი კვირის შემდეგ, თუმცა რაკი არსებობდა ძალიან ბევრი წლის განმავლობაში ეს ტრადიცია, პატრიარქმა დატოვა ეს ორშაბათი, აღდგომიდან მეორე დღე.

„ამ დროს ძალიან კარგი წესია, როდესაც მივდივართ და მიცვალებულებს ვულოცავთ ქრისტიანების მთავარ დღესასწაულს, უფლის აღდგომას. ყველა სასაფლაოზე იკურთხება საფლავები. ეს ძალიან მნიშვნელოვანი ტრადიციაა, როგორც თბილისში, ასევე ეპარქიებში და ძალიან დიდი ნუგეშია მიცვალებულთა სულებისა და მათი ახლობლებისთვის“, - აღნიშნა დეკანოზმა გიორგი ბერაძემ.

დღეიდან ბრწყინვალე შვიდეული დაიწყო.

ბრწყინვალე შვიდეულის ორშაბათს, მართლმადიდებელი ეკლესია საფლავთა კურთხევის დღეს აღნიშნავს.