1794936548
დედოფლისწყაროს ორ საჯარო სკოლაში ჩუტყვავილასა და მუნის შემთხვევები დაფიქსირდა
დედოფლისწყაროს ორ საჯარო სკოლაში ჩუტყვავილასა და მუნის შემთხვევები დაფიქსირდა.
საზოგადოებრივი ჯანდაცვის ცენტრის ეპიდემიოლოგის, ლალი ალადაშვილის ინფორმაციით, მუნით ერთი ოჯახის ორი წევრია დაავადებული, მესამე კი ცალკეული შემთხვევაა.
ეპიდემიოლოგი ამბობს, რომ სკოლების ექიმებმა საკლასო ოთახებში დეზინფექცია ჩაატარეს. პარალელურად, მიმდინარეობს მოსწავლეების მონიტორინგი.
"მოვუწოდებ სკოლების, ბაღებისა და საჯარო დაწესებულებების თანამშრომლებს, დაიცვან ჰიგიენური წესები და სიმპტომების გამოვლენისთანავე მიმართონ ექიმს“,-განაცხადა ლალი ალადაშვილმა.
ჩუტყვავილა გასულ წელს სოფელ ზემო მაჩხაანშიც გამოვლინდა. რაც შეეხება მუნს, ეპიდემიოლოგის თქმით, წინა თვეებში შემთხვევები თბილისის სკოლებშიც დაფიქსირდა და არსებობდა მისი ფართოდ გავრცელების მოლოდინი.
ჩუტყვავილა ვირუსული ინფექციაა. ახასიათებს სიცხე, ქავილი და კანზე სითხით სავსე ბუშტუკოვანი გამონაყარი.მუნი კი კანის პარაზიტული დაავადებაა, რომელსაც იწვევს კანში ჩაბუდებული მიკროსკოპული ტკიპა. ახასიათებს ძლიერი ქავილი, განსაკუთრებით ღამით.










