„ეს ის შემთხვევაა, რომ არ გავალ სათათბიროდ“ - რა ახალი დეტალები გაირკვა ცოლის მკვლელობაში ბრალდებულის პროცესზე

ცოლის მკვლელობაში ბრალდებულ როინ მებონიას წინასწარი პატიმრობა შეეფარდა. დღევანდელ პროცესზე ახალი დეტალები გახდა ცნობილი.

ირკვევა, რომ ქმარმა ცოლს დანა 10-ჯერ დაარტყა, ჭრილობები მოკლულს ძირითადად ყელის არეში აქვს მიყენებული. დანაშაულის ნაწილს ასახავს ერთ-ერთი თვითმხილველის მიერ გადაღებული ვიდეო, სადაც ჩანს როგორ ურტყამს ცივ იარაღს ქალს მამაკაცი. დაკავებულს სასამართლოს გადაწყვეტილება არ გაუპროტესტებია, შესაბამისად ადვოკატი სასამართლოს ამ გადაწყვეტილებას არ გაასაჩივრებს.

პროკურორის ინფორმაციით, მუნიციპალურ ტრანსპორტში დამონატაჟებული სათვალთვალო კამერის ჩანაწერი არსებობს, ის დაარქივებულია და რამდენიმე დღეში გადაეცემა საგამოძიებო უწყებას.

ბრალდებულის ადვოკატმა, სულხან კომახიძემ, სასამართლოს სხდომამდე და სხდომის შემდეგაც განმარტა რომ მისი დაცვის ქვეშ მყოფს აქვს ფსიქიკური პრობლემები და უნდა ჩატარდეს შესაბამისი ექსპერტიზა. ბრალდებული წაყენებულ ბრალს არ უარყოფს, მას შემთხვევის ადგილიდან მიმალვა არ უცდია, თუმცა მოვლენები არ ახსოვს, ეს ფაქტი კი სერიოზულ გამოკვლევას საჭიროებს.

მოსამართლე ლაშა კლდიაშვილის განცხადებით, ბრალდებულისგან დანაშაულის გაგრძელების ნიშნები არსებობს.

„ეს ის შემთხვევაა, რომ არ გავალ სათათბიროდ, ადვოკატიც მომხრეა პატიმრობის შუამდგომლობის. სასამართლომ ადგილზე თათბირით მიიღო გადაწყვეტილება და მიაჩნია, რომ ბრალდებულის მიმართ არსებობს აღკვეთის შუამდგომლობის გამოყენების გარემოებები და დაადგინა, რომ პროკურორის შუამდგომლობა დაკმაყოფილდეს. სასამართლომ გაითვალისწინა ბრალდება და დანაშაულებრივი ქმედება, მეუღლის მიმართ მკვლელობა, ორივე შემთხვევაში ბრალდებული შერაცხადია თუ შეურაცხადი, არსებობს დანაშაულის გაგრძელების საფუძველი“, – განაცხადა მოსამართლე ლაშა კლდიაშვილმა.

ცნობისთვის, 21 მაისს, გურამიშვილის გამზირზე მოძრავ საზოგადოებრივ ტრანსპორტში, როინ მებონიამ მეუღლეს სოფი კვარაცხელიას არასრულწლოვანი შვილების თანდასწრებით, ცივი იარაღით სხეულის სხვადასხვა ადგილზე მრავლობითი დაზიანებები მიაყენა. მიყენებული დაზიანებების შედეგად ის ადგილზე გარდაიცვალა.