ოზურგეთის მუნიციპალიტეტში „სხვადასხვა ეროვნების წარმომადგენელ ქალთა ეკონომიკური შესაძლებლობების გაძლიერება - საჭიროებათა კვლევა“ პრეზენტაცია გაიმართა

26 ოქტომბერს ოზურგეთის მუნიციპალიტეტში „თანამონაწილეობისა და ჩართულობის ცენტრი სიპისის“ ორგანიზებით „ოზურგეთში მცხოვრებ სხვადასხვა ეროვნების წარმომადგენელ ქალთა ეკონომიკური შესაძლებლობების გაძლიერება - საჭიროებათა კვლევა“ პრეზენტაცია ჩატარდა.

პრეზენტაციას ესწრებოდნენ საკრებულოს წარმომადგენლები, მათ შორის საკრებულოს თავმჯდომარე დავით დარჩია, საკრებულოს გენდერული თანასწორობის საბჭოს ხელმძღვანელი ნინო ჭანიშვილი. ასევე საკრებულოს აპარატის სხვა წარმომადგენლები და პროექტის ბენეფიციარი ქალები.

კვლევა განხორციელდა პროექტის: „ოზურგეთში მცხოვრებ სხვადასხვა ეროვნების წარმომადგენელ ქალთა ეკონომიკური შესაძლებლობების გაძლიერება - შინსაქმე ვაქციოთ პროფესიად“ ფარგლებში.

კვლევის მიზანი იყო ოზურგეთის მუნიციპალიტეტში მცხოვრები ეკონომიკურ საქმიანობაში ჩართული, სხვადასხვა ეროვნების წარმომადგენელი ქალების ეკონომიკური განვითარების კუთხით არსებული საჭიროებების გამოკვლევა, მათი ეკონომიკური გაძლიერებისა და სამოქალაქო ინტეგრაციის ხელშეწყობა.

კვლევის სამიზნე ჯგუფს წარმოადგენდნენ მაღალმთიანი რეგიონიდან ჩამოსახლებული ეკომიგრანტები (სოფლები: ლაითური, მთისპირი ნარუჯა), რეპატრიანტი მუსლიმი მესხები (ნასაკირალის დასახლება) და სომხური თემის და ქართულ-პოლონური დიასპორის წარმომადგენელი ქალები (ქ. ოზურგეთი).

კვლევის ამოცანები პროექტის გუნდის მიერ თავიდანვე განისაზღვრა და როგორც პრეზენტაციაზე ითქვა, ეს იყო მოწყვლად ჯგუფებსა და ადგილობრივ ხელისუფლებას შორის კომუნიკაციის ხელშეწყობა და დიალოგის წარმოება, გადაწყვეტილებების მიღების პროცესში ქალების ჩართულობის გაზრდა და ასევე, ქალთა ეკონომიკური გაძლიერების მიზნით რეგიონში არსებული მიდგომების იდენტიფიცირება და შესაბამისი რეკომენდაციების შემუშავება.

კვლევის ავტორთა განცხადებით, სამეწარმეო საქმიანობაში ჩართული ქალების გამოკითხვების და ნარატიული ისტორიების გაანალიზების შედეგად საინტერესო და მნიშვნელოვანი მიგნებები და რეკომენდაციები შეიმუშავეს, რომელთა ძირითადი ნაწილიც პრეზენტაციაზე წარმოადგინეს:

1. მუნიციპალიტეტს აქვს სხვადასხვა ელექტრონული პლატფორმების გაზიარების კარგი პრაქტიკა, თუმცა ქალთა მოწყვლადი ჯგუფები არ ფლობენ მუნიციპალური ელექტრონული სერვისების შესახებ ინფორმაციას და არ ხორციელდება მათთვის ხელსაყრელი ფორმით ამ ინფორმაციის მიწოდება;
2. კვლევის შედეგად გამოიკვეთა, რომ სხვადასხვა ეკონომიკურ საქმიანობაში ჩართულ ქალებს არ აქვთ კავშირი ერთმანეთთან, და შესაბამისად, ქალები ვერ უზიარებენ ერთმანეთს მნიშვნელოვან გამოცდილებას;
3. ქალი მეწარმეების უმეტესობა არ სარგებლობს ციფრული ტექნოლოგიების სიკეთეებით, რაც განსაკუთრებით გამოიკვეთა პანდემიის პირობებში;
4. სასურველია, ცნობიერების ამაღლების კამპანიაში ქალთა ეკონომიკური საქმიანობის დაწყების წამახალისებელი და საინფორმაციო ნაწილიც იყოს მოაზრებული. მათ შორის, ქალების ფინანსებზე წვდომის გასაზრდელად დაიგეგმოს და განხორციელდეს უწყვეტი კამპანიები, რომელიც გააუმჯობესებს საზოგადოების ცნობიერებას ქალისა და კაცის, როგორც თანაბარი რიგის მემკვიდრეების შესახებ, მცირე მეწარმეობის და ბიზნესის ხელშემწყობ პროექტებზე;
5. სასურველია, მოხდეს სახელმწიფოს მიერ მართული ეკონომიკური დახმარების პროგრამების შესახებ ინფორმაციების გაზიარება მუნიციპალიტეტის ოფიციალურ ვებგვერდზე;
6. სასურველია, მუნიციპალიტეტმა აწარმოოს მიზნობრივი საინფორმაციო კამპანია სერვისების ხელმისაწვდომობის გასაზრდელად და ასევე აწარმოოს სტატისტიკა გენდერულ ჭრილში სერვისების მოხმარების შესახებ.
7. სასურველია, შეიქმნას და განვითარდეს ქალი მეწარმეების ქსელური კავშირები, სადაც ქალებს მიეცემათ ცოდნის გაზიარების, კონტაქტების დამყარების და პარტნიორული ურთიერთობების ჩამოყალიბების შესაძლებლობა;
8. მიზანშეწონილია, მუნიციპალიტეტის შესაბამისმა სამსახურებმა ხელი შეუწყოს მუნიციპალიტეტში ქალთა ცნობიერების ამაღლებას STEM პროგრამების მიმართულებით.
9. მიზანშეწონილია, გენდერული თანასწორობის საბჭომ შეისწავლოს და დაამუშაოს ინფორმაცია მუნიციპალიტეტში ქალთა ეკონომიკურ პროგრამებში მონაწილეობის, პროფესიულ განათლებაზე ქალთა ხელმისაწვდომობისა და ეკონომიკური გაძლიერებისთვის ხელის შემშლელი ფაქტორების შესახებ;
10. საბჭოს მიერ დაგეგმილი ღონისძიებები უნდა შეიცავდეს ქალებისა და გოგონების ეკონომიკურ გაძლიერებაზე ორიენტირებულ ისეთ მექანიზმებს, როგორიცაა მენტორობა, ახალი ცოდნის შეძენა, უნარების გაუმჯობესება;
11. მნიშვნელოვანია, ოზურგეთის მუნიციპალიტეტმა, პარტნიორ ორგანიზაციებთან ერთად, შეიმუშაოს თანამშრომლობის ფორმატი, რომელიც უზრუნველყოფს აღმასრულებელი და წარმომადგენლობითი ორგანოს კავშირს და ხელს შეუწყობს ქალთა ეკონომიკური შესაძლებლობების განვითარებას ინსტიტუციურ დონეზე
12. სასურველია, მუნიციპალიტეტმა სექტორთშორისი თანამშრომლობის საფუძველზე შეიმუშაოს ქალთა ეთნიკური ჯგუფების მხარდამჭერი პროექტები, იზრუნოს ქალთა მოწყვლადი ჯგუფების ცხოვრების ხარისხის გაუმჯობესებაზე, სხვადასხვა პროგრამაში მათი ჩართვის გზით;
13. მიზანშეწონილია გზამკვლევის შემუშავება, რომელიც დაეხმარება ქალთა ეთნიკურ ჯგუფებს მსგავსი პროგრამებით სარგებლობაში
14. მნიშვნელოვანია, ჩატარდეს საინფორმაციო კამპანიები, რომელიც წაახალისებს მოქალაქეებს ისარგებლონ მეწარმე ქალების მფლობელობაში არსებული სერვისებით, რაც გააძლიერებს ქალებს როგორც ფინანსურად, ასევე გაზრდის მათ შესახებ ცნობადობას საზოგადოებაში;
15. მიზანშეწონილია, მერიისა და საკრებულოს საზოგადოებასთან ურთიერთობის სამსახურებმა, გენდერული თანასწორობის საბჭოსთან თანამშრომლობით, ხელი შეუწყონ ქალთა მოწყვლად ჯგუფებთან კომუნიკაციის გაუმჯობესებას და მათ ჩართულობას სხვადასხვა საზოგადოებრივ აქტივობებში.

კვლევა დადებითად შეფასდა ოზურგეთის საკრებულოს გენდერული თანასწორობის საბჭოს მიერ.

„ვფიქრობ აღნიშნული კვლევა ჩვენი სამსახურისთვის სამაგიდო დოკუმენტი გახდება, რომელსაც აუცილებლად გავიზიარებთ და პრაქტიკულად განვახორციელებთ. ამასთან კვლევაში მოცემული რეკომენდაციების მიხედვით მოხდება მომავალი წლის ბიუჯეტის დაგეგმვაც“ - განაცხადა მუნიციპალიტეტის გენდერული თანასწორობის საბჭოს თავმჯდომარე ნინო ჭანიშვილმა.

შეხვედრაზე ასევე გამოითქვა სურვილი პროექტის გაგრძელების შესახებ, რასაც თავის მხრივ მხარი დაუჭირეს საკრებულოს წარმომადგენლებმაც.

პროექტს „შინსაქმე ვაქციოთ პროფესიად“  ოზურგეთის მუნიციპალიტეტში მცხოვრები ეთნიკური უმცირესობის თემის ქალებისთვის  „თანამონაწილეობისა და ჩართულობის ცენტრი - სიპისი“, „ქალთა ფონდის“ ხელშეწყობითა და ევროკავშირის ფინანსური მხარდაჭერით ახორციელებს.

პუბლიკაცია შექმნილია ევროკავშირის მხარდაჭერით, მის შინაარსზე სრულად პასუხისმგებელია „თანამონაწილეობისა და ჩართულობის ცენტრი „სიპისი“ და შესაძლოა, რომ იგი არ გამოხატავდეს ევროკავშირის შეხედულებებს.