ინფრასტრუქტურის მინისტრი კახეთში მიმდინარე ინფრასტრუქტურულ სამუშაოებს გაეცნო

რევაზ სოხაძემ, გარემოს დაცვისა და სოფლის მეურნეობის მინისტრთან, დავით სონღულაშვილთან ერთად, თელავში, ახმეტასა და გურჯაანში გზების, სკოლების, საბავშვო ბაღებისა და წყალარინება-წყალმომარაგების სისტემების მშენებლობა-რეაბილიტაცია და ურბანული სივრცეების განახლების მიმდინარე პროცესი ადგილზე მოინახულა.

ამჟამად, გურჯაანისა და ახმეტის მუნიციპალიტეტის სოფლებში საერთო ჯამში, 250 ბავშვზე გათვლილი 4 საბავშვო ბაღი შენდება. პროექტები სახელმწიფო ბიუჯეტიდან ფინანსდება.,,ქალაქებისა და კურორტების განვითარების პროგრამის“ ფარგლებში კი, თელავის ისტორიულ უბანში, გრძელდება დრამატული თეატრის მიმდებარე სკვერის განახლება და ღია საზოგადოებრივი მოედნის მოწყობა, დასკვნით ეტაპზეა ქალაქის რამდენიმე ქუჩის რეაბილიტაციისა და მიმდებარე შენობა-ნაგებობების სარეაბილიტაციო სამუშაოები.