საკვები, რომელიც ძაღლებისთვის საშიშია - სპეციალისტის გაფრთხილება

ბევრი ადამიანი შინაურ ცხოველებს სხვადასხვა ნუგბარით ანებივრებს, თუმცა სპეციალისტები გვაფრთხილებენ, რომ ზოგიერთი საკვები, რომელიც ადამიანებისთვის სრულიად უსაფრთხოა, ძაღლებისთვის შესაძლოა საზიანო ან ტოქსიკურიც კი იყოს.

ვეტერინარების განმარტებით, ძაღლებს ადამიანებისგან განსხვავებული მეტაბოლიზმი აქვთ, რის გამოც მათთვის განკუთვნილი არასწორი საკვების მიღებამ შეიძლება ჯანმრთელობის სერიოზული პრობლემები გამოიწვიოს.

ერთ-ერთ ასეთ პროდუქტად ავოკადო მიიჩნევა. ის შეიცავს ტოქსინ პერსინს, რომელიც დიდი რაოდენობით მიღების შემთხვევაში ძაღლებში ღებინებასა და დიარეას იწვევს.

ვაშლი თავად ტოქსიკური არ არის, თუმცა მისი თესლები შეიცავს ნაერთ ამიგდალინს, რომელიც დიდი რაოდენობით მიღების შემთხვევაში შეიძლება საზიანო იყოს.

სპეციალისტები ასევე გვირჩევენ, სიფრთხილით მოვეკიდოთ ნიორსა და ხახვს, რადგან მათში არსებული თიოსულფატი აზიანებს სისხლის წითელ უჯრედებს და გარკვეულ შემთხვევებში შეიძლება მოწამვლაც გამოიწვიოს.

რძე და რძის პროდუქტები ძაღლებისთვის ყოველთვის უსაფრთხო არ არის. ბევრ მათგანს ლაქტოზის აუტანლობა აქვს, რაც საჭმლის მომნელებელ სისტემაში დისკომფორტს, მათ შორის დიარეას, იწვევს.

განსაკუთრებით ტოქსიკურად მიიჩნევა მაკადამიის კაკალი, რომელმაც შეიძლება გამოიწვიოს ღებინება, სისუსტე, სხეულის ტემპერატურის მომატება და მოძრაობის კოორდინაციის დარღვევა.

სიფრთხილეა საჭირო მდოგვის გამოყენების დროსაც. დიდი რაოდენობით ის ძაღლებისთვის ტოქსიკურია.

ერთ-ერთ ყველაზე ცნობილ საშიშ პროდუქტად შოკოლადი ითვლება, რადგან ის შეიცავს სტიმულატორს — თეობრომინს, რომელიც ძაღლების ორგანიზმისთვის შხამიანია და მოქმედებს კუჭ-ნაწლავზე, გულსა და ცენტრალურ ნერვულ სისტემაზე.

ასევე სახიფათოა მოხარშული ძვლები. ისინი ადვილად იმსხვრევა და შეიძლება გამოიწვიოს ნაწლავების დაზიანება ან დახვრეტაც კი.

ვეტერინარები განსაკუთრებულად აღნიშნავენ ყურძენსა და ქიშმიშს, რადგან მცირე რაოდენობამაც კი შეიძლება ძაღლებში თირკმლის მწვავე უკმარისობა გამოიწვიოს.

გარდა ამისა, საფრთხეს წარმოადგენს კოფეინი და დაუმზადებელი ცომი. საფუარიანი ცომის მიღების შემთხვევაში დუღილის პროცესში წარმოიქმნება ეთანოლი, რაც ალკოჰოლური მოწამვლის მიზეზი შეიძლება გახდეს.

სპეციალისტები შინაური ცხოველების პატრონებს ურჩევენ, ძაღლებს მხოლოდ მათთვის განკუთვნილი საკვები მისცენ და საეჭვო სიმპტომების შემთხვევაში აუცილებლად მიმართონ ვეტერინარს.