უკრაინელების ტკივილი განსაკუთრებულად გვტკენს გულს, საზოგადოებას მადლობა უნდა გადავუხადოთ სოლიდარობის უპრეცედენტო მაგალითისთვის - კობახიძე

პარტია "ქართული ოცნების" თავმჯდომარე ირაკლი კობახიძემ, პარლამენტის სასესიო სხდომაზე უკრაინელ ხალხს სოლიდარობა კიდევ ერთხელ გამოუცხადა. როგორც ირაკლი კობახიძემ განაცხადა, ქართველებსა და უკრაინელებს ერთმანეთთან დიდი ისტორია აკავშირებთ.

კობახიძის თქმით, საქართველო უკრაინას გვერდით უდგას არა მარტო სიტყვით, არამედ საქმითაც.

"კიდევ ერთხელ სოლიდარობა უნდა გამოვხატოთ ჩვენი მეგობარი უკრაინელი ხალხის მიმართ. ჩვენ ვხედავთ, რომ ჩვენი მეგობარი ხალხი იბრძვის დამოუკიდებლობისთვის, თავისუფლებისთვის და ჩვენ მათ გვერდით ვუდგავართ. ვხედავთ, როგორ გულშემატკივრობს ქართველი ხალხი მეგობარ ხალხს თავისუფლებისთვის ბრძოლაში და კიდევ ერთხელ უნდა ითქვას, რომ ჩვენს მეგობრობას აქვს ძალიან ხანგრძლივი ისტორია, ჩვენ გვაქვს განსაკუთრებული ემოციური კავშირი უკრაინელებთან და შესაბამისად, მათი ტკივილი ჩვენ განსაკუთრებულად გვტკენს გულს. სწორედ ამის გამოხატულებაა ის განსაკუთრებული სოლიდარობა, რომელიც აჩვენა ქართველმა ხალხმა. ჩვენს საზოგადოებას განსაკუთრებული მადლობა უნდა გადავუხადოთ ამ სოლიდარობის უპრეცედენტო მაგალითვისთვის. ჩვენი მთავარი პასუხისმგებლობა და ვალია, რომ უკრაინას მხარი დავუჭიროთ ყველა დონეზე - სიტყვით და საქმით," - განაცხადა კობახიძემ.