შალვა პაპუაშვილი საია-ს განცხადებაზე: ერთის მხრივ შეიძლება სისულელედ ჩანდეს, მაგრამ მეორეს მხრივ თუ გავითვალისწინებთ მათ როლს ამ არჩევნებში, მათ ფაქტობრივად გაინაწილეს „ისფედთან“ როლი

„როდესაც სარჩელი შედის არჩევნების კონსტიტუციურობასთან დაკავშირებით, არა არჩევნები საჩივრდება, არამედ ნორმა რომელიმე კანონის“, - განაცხადა პარლამენტის თავმჯდომარემ შალვა პაპუაშვილმა გადაცემაში „იმედი LIVE“, რითაც საია-ს მიერ გავრცელებულ განცხადებას გამოეხმაურა.

„ახალგაზრდა ადვოკატთა ასოციაცია“ ამტკიცებს, რომ საქართველოს პარლამენტი ვერ ცნობს არჩეული წევრების უფლებამოსილებას მანამ, სანამ არ დასრულდება დავა საკონსტიტუციო სასამართლოში.

შალვა პაპუაშვილის განცხადებით, საია-მ „ისფედის“ როლი შეითავსა და მიზანმიმართულად ავრცელებს დეზინფორმაციას.

„თუ კი სასამართლო ჩათვლის, რომ ეს ნორმა ეწინააღმდეგებოდა კონსტიტუციას და იმდენად მნიშვნელოვანი არის, რომ გავლენა მოახდინა შედეგებზე, მაშინ ის არაკონსტიტუციურად თავად არჩევნებსაც და ახალი არჩევნები ისედაც ტარდება. ამიტომ აქ შეფერხებას არანაირი დატვირთვა არ აქვს იმიტომ, რომ ახალი არჩევნები ჩატარდება ასეც და ისეც.

„ახალგაზრდა ადვოკატთა ასოციაციას“ ჰქონდა დღეს ეს განცხადება. რაღაც მომენტში ხომ უნდა დაფიქრდნენ, რაში იხარჯება ამერიკელი ხალხის და ევროპელი ხალხის ფული. მილიონები იხარჯება ამ ორგანიზაციაში, იმისთვის, რომ ამ სისულელის ტირაჟირება გააკეთონ. რაც ერთის მხრივ შეიძლება სისულელედ ჩანდეს, მაგრამ მეორეს მხრივ თუ გავითვალისწინებთ მათ როლს ამ არჩევნებში, მათ ფაქტობრივად გაინაწილეს „ისფედთან“ როლი, მათ შორის ფარულობასთან დაკავშირებით, აბსოლუტურად ყალბი საჩივრები აქვთ მათ წარდგენილი, მავნებლობა აბსოლუტური“, - განაცხადა შალვა პაპუაშვილმა.

მან, ასევე, გაიხსენა „საერთაშორისო გამჭვირვალობის“ მიერ გავრცელებული დეზინფორმაცია, რომელთან დაკავშირებითაც „ქრონიკამ“ განმარტებები სთხოვა შვედეთის საელჩოს. ცნობისთვის, ორგანიზაციას სწორედ შვედეთის საელჩო აფინანსებს. შვედეთის საელჩომ „საერთაშორისო გამჭვირვალობის“ მიერ გავრცელებულ დეზინფორმაციას „გამოხატვის თავისუფლება“ უწოდა. შალვა პაპუაშვილის განცხადებით, სწორედ ასეთი დეზინფორმაციებით ხდება დესტაბილიზაციების მცდელობები.