„საუბარი დავიწყოთ და დავასრულოთ მიხეილ სააკაშვილის განთავისუფლების მოთხოვნით“ - გიგი უგულავა ოპოზიციას მიმართავს, ნებისმიერ თემაზე ბრიფინგი რუსთავის ციხიდან გამართონ

"თანამოაზრე პოლიტიკოსებო და ტელევიზიით ხშირად მოსაუბრენო, ყოველი სატელევიზიო ჩართვა, პარტიული ბრიფინგი რუსთავის ციხიდან გავმართოთ - ყოველი გამოსვლა, სულ რომ ამინდზე, ტრიგონომეტრიაზე ან მფრინავ სპილოებზე გვიწევდეს საუბარი, მიხეილ სააკაშვილის გათავისუფლების მოთხოვნით დავიწყოთ და დავასრულოთ", - ამის შესახებ ოპოზიციონერი პოლიტიკოსი გიგი უგულავა სოციალურ ქსელში წერს.

„მესმის, ლოჯისტიკურად, შესაძლოა, რთულია, მათ შორის, ტელევიზიებისთვისაც. სახლიდან, სტუდიიდან გაცილებით მოსახერხებელია საუბარი. დრო, საწვავი და ნერვები ნაკლებად იხარჯება, მაგრამ, ვფიქრობ, რომ ეს თუნდაც მცირედი ძალისხმევა პუტინისა და ივანიშვილის ტყვეს, მიხეილ სააკაშვილის დასახსნელად ძალიან მნიშვნელოვანია. მნიშვნელოვანია პატიმრის გასამხნევებლად, მნიშვნელოვანია ამ უსამართლო და ისტორიული სირცხვილის ჩამოსარეცხად, მნიშვნელოვანია, რომ ეს თემა მუდმივად დღის წესრიგში იყოს, სანამ მიზანს არ მივაღწევთ.

ერთი მერცხალი გაზაფხულს ვერ მოიყვანს, მაგრამ თუ ამ ძალისხმევას ბევრი დავნერგავთ, მე დარწმუნებული ვარ, რომ ის ამაოდ არ ჩაივლის“, - წერს გიგი უგულავა.