საქართველოში იქნება მშვიდობა და გაგრძელდება ეკონომიკური ზრდა - ხალხის გვერდში დგომით, ხელისუფლება არ დაუშვებს, რომ საქართველოს მშვიდობა ვინმემ სხვის ომში დაახურდავოს - ლევან მახაშვილი

ყველას მივმართავ, ვისაც ამ გეოპოლიტიკური ქაოსის შემხედვარე, შიშის თუ გაურკვევლობის განცდა აქვს, ფიქრობს, დარდობს იმაზე, რა იქნება საქართველოში ხვალ - იქნება მშვიდობა, გაგრძელდება არნახული ეკონომიკური ზრდა და თითოეული ოჯახისთვის სასიკეთო გადაწყვეტილებები, - განაცხადა პარლამენტის ევროპასთან ინტეგრაციის კომიტეტის თავმჯდომარე ლევან მახაშვილმა.

როგორც პლენარულ სხდომაზე სიტყვით გამოსვლისას მახაშვილმა აღნიშნა, თუ ადამიანებს გააბრუებ, ისინი გააკეთებენ უცხოს გასაკეთებელს და სულაც აღარ იქნება საჭირო ტანკებით სადმე შესვლა. მისი თქმით, სწორედ ამიტომ არის თავდასხმები იმ მედიასაშუალებებზე, ვინც სიმარტლეს ემსახურება.

"გეოპოლიტიკურ ბრძოლებში, ბრძოლა მიდის არამხოლოდ მიწისთვის ან რესურსებისთვის, არამედ, სიმართლისთვის, ანუ, ადამიანების გონებისთვის. ჩვენ ვხედავთ, თუ გააბრუებ ადამიანებს, სულ არ არის საჭირო სადმე ტანკებით შესვლა, ეს ადამიანები გააკეთებენ უცხოს გასაკეთებელს და ამის მიმართ სიმართლე არის საუკეთესო ფარი. ამიტომ არის გაცხოველებული თავდასხმები "იმედზე", "პოსტივიზე" და ყველა სხვაზე, ვინც სიმართლეს ემსახურება. ამიტომ, მიუხედავად უპასუხისმგებლო ოპოზიციის ძირგამომთხრელი ნაბიჯებისა, ავანტიურაში ქვეყნის ჩათრევის მცდელობებისა, იაფფასიანი ჰიბრიდული თუ საინფორმაციო ოპერაციებისა, საქართველოში იქნება მშვიდობა და ქვეყანა გააგრძელებს ნორმალურ განვითარებას იმიტომ, რომ ქვეყანას საბედნიეროდ მართავს პასუხისმგებლიანი ხელისუფლება და ხალხის გვერდში დგომით, ხელისუფლება არ დაუშვებს, რომ საქართველოს მშვიდობა ვინმემ სხვის ომში დაახურდავოს", - განაცხადა მახაშვილმა.