ნიკოლ ფაშინიანი: სომხეთს ელექტროენერგიის იმპორტისთვის მეტი ვარიანტი სჭირდება, მათ შორის აზერბაიჯანიდან, იმპორტის საკითხს ასევე განვიხილავთ საქართველოსთან, ირანთან და თურქეთთან

სომხეთის პრემიერ-მინისტრმა, ნიკოლ ფაშინიანმა განაცხადა, რომ, ქვეყანაში ხელოვნური ინტელექტის სექტორში განხორციელებული ინვესტიციების გათვალისწინებით, სომხეთს დამატებითი ელექტროენერგიის იმპორტისთვის სხვადასხვა ვარიანტი სჭირდება, მათ შორის, საჭიროების შემთხვევაში, აზერბაიჯანიდან.

„ელექტროენერგიის მოხმარების სხვადასხვა რეჟიმი არსებობს და ზოგჯერ ქვეყნებს აქვთ ელექტროენერგიის ჭარბი რაოდენობა, ზოგჯერ კი – მოთხოვნა. ელექტროენერგიის იმპორტის საკითხს ასევე განვიხილავთ საქართველოსთან, ირანთან და თურქეთთან“, – განაცხადა ფაშინიანმა ბრიფინგზე.

სომხეთის პრემიერ-მინისტრის თქმით, არსებობს პროექტი, რომლის ფარგლებშიც საქართველოს საზღვართან ევროკავშირის დაფინანსებით კონვერტორული სადგური შენდება, რათა ელექტროენერგიის იმპორტი და ექსპორტი გამარტივდეს.

ფაშინიანმა ეს განცხადება მას შემდეგ გააკეთა, რაც სომხეთისა და აზერბაიჯანის მთავრობების წარმომადგენლებმა შეხვედრა გამართეს ელექტროენერგიით ვაჭრობისა და ენერგეტიკული ინფრასტრუქტურის ურთიერთდაკავშირების საკითხებზე.