მინდა, შევახსენო ყველა პირს, ვისაც ვიწვევთ კომისიის სხდომაზე, ჩვენ არ ვხუმრობთ, სერიოზულად ვუდგებით საკითხს, მოლოდინი გვაქვს, მოწვეული პირებიც სერიოზულად მიუდგებიან პროცესს - თეა წულუკიანი

მამუკა ხაზარაძესთან დაკავშირებით სისხლის სამართლის პროცესის პირველი ეტაპი დასრულდა და უკვე დაიწყება სისხლის სამართლის საქმის არსებითი განხილვა. დაველოდებით არსებით განხილვას. იქ უკვე გადაწყვეტილების რამდენიმე ვარიანტი აქვს მოსამართლეს, რომელთა შორის არის სისხლის სამართლის ჯარიმა, ასევე ერთ წლამდე პატიმრობა, – ამის შესახებ პარლამენტში შექმნილი დროებითი საგამოძიებო კომისიის სხდომაზე კომისიის თავმჯდომარე თეა წულუკიანმა განაცხადა.

წულუკიანის თქმით, პროცესი გრძელდება, რასაც კომისიის წევრები ყურადღებით აკვირდებიან.

„ჩვენ, როგორც კომისია, უნდა გამოვეხმაუროთ საქართველოს სასამართლო ხელისუფლების მიერ დღეს მიღებულ გადაწყვეტილებას მამუკა ხაზარაძესთან დაკავშირებით. ამ გადაწყვეტილებით ირკვევა, რომ სისხლის სამართლის პროცესის პირველი ეტაპი დასრულდა, რომელიც გულისხმობს საქმის არსებითად განხილვისთვის მომზადებას და უკვე დაიწყება სისხლის სამართლის საქმის არსებითი განხილვა. მოსამართლემ ჩათვალა, რომ არ არის საჭირო აღკვეთის ღონისძიებად წინასწარი პატიმრობის გამოყენება. ჩვენ შეგვიძლია, მხოლოდ ამ შეფასებას დავეთანხმოთ, ვინაიდან ადამიანის უფლებათა ევროპული კონვენციის მეხუთე მუხლის მესამე პუნქტით ასეთი კატეგორიის საქმეებზე სწორედ ასეთი გადაწყვეტილების მიღებაა სტანდარტი და შესაბამისი კონვენციურ სტანდარტთან. დაველოდებით არსებით განხილვას. იქ უკვე როგორც იცით, შესაძლებელია, მოსამართლემ რამდენიმე გადაწყვეტილება მიიღოს, გადაწყვეტილების რამდენიმე ვარიანტი აქვს, რომელთა  შორის არის სისხლის სამართლის ჯარიმა, ასევე ერთ წლამდე პატიმრობა. პროცესი გრძელდება. რასაკვირველია, ჩვენ, როგორც დამკვირვებლები, ყურადღებით ვაკვირდებით“, – განაცხადა თეა წულუკიანმა.

ამასთან, როგორც თეა წულუკიანმა აღნიშნა, მოლოდინი აქვს, რომ სერიოზულად მიუდგებიან კომისიის სხდომებს ის პირები, რომლებსაც ახსნა-განმარტებისთვის იწვევენ.

„მინდა, კიდევ ერთხელ შევახსენო ყველა პირს, ვისაც ახსნა-განმარტებისთვის ვიწვევთ სხდომაზე, რომ ჩვენ არ ვხუმრობთ, სერიოზულად ვუდგებით ამ საკითხს და მოლოდინი გვაქვს, რომ აქ მოწვეული პირებიც სერიოზულად მიუდგებიან ამ პროცესს“, – განაცხადა თეა წულუკიანმა.