მარიამ ქვრივიშვილი „ექსპო 2027 ბელგრადის“ პრეზენტაციას გაეცნო

სერბეთში ვიზიტის ფარგლებში, საქართველოს ეკონომიკისა და მდგრადი განვითარების მინისტრი მარიამ ქვრივიშვილი ბელგრადის საგამოფენო ცენტრს ეწვია, სადაც მულტიმედიურ სივრცეში მომავალი საერთაშორისო გამოფენის – „ექსპო 2027“ – ის პრეზენტაციას გაეცნო. ასეთი მაღალი რანგის საერთაშორისო გამოფენა დასავლეთ ბალკანეთის რეგიონში პირველად ჩატარდება და ის 2027 წლის 15 აპრილიდან 15 აგვისტოს ჩათვლით გაიმართება. გამოფენის თემაა – „Play for Humanity: Sport and Music for All“.

საქართველო იმ ქვეყნებს შორისაა, რომელიც ექსპო 2027 – ში მონაწილეობას მიიღებს და საერთაშორისო აუდიტორიის წინაშე საკუთარი კულტურისა და სპორტის მიღწევებს წარადგენს.

როგორც ეკონომიკისა და მდგრადი განვითარების მინისტრმა მარიამ ქვრივიშვილმა განაცხადა, ექსპო 2027 – ში საქართველოს მონაწილეობა ხელს შეუწყობს ჩვენი ქვეყნის ცნობადობის ზრდას სერბეთსა  და ბალკანეთში. მისი თქმით, ორგანიზატორები ელოდებიან, რომ გამოფენის 93 დღის განმავლობაში მას 4 მლნ-ზე მეტი ვიზიტორი ნახავს.

„ბელგრადთან პირდაპირმა ფრენებმა ხელი შეუწყო ორი ქვეყნის თანამშრომლობას ტურიზმის სექტორშიც. ექსპოს მიმდინარეობისას საქართველოს კულტურისა და ისტორიული მემკვიდრეობის შესახებ ინფორმაციას ასი ათასობით დამთვალიერებელი ნახავს და დაინტერესდება საქართველოთი. ის შესაძლებლობები, რასაც სერბეთი ექსპოს მონაწილეებს სთავაზობს, შთამბეჭდავია,” – აღნიშნა მარიამ ქვრივიშვილმა.

საერთაშორისო სპეციალიზებული გამოფენა „ექსპო“  გამოფენების საერთაშორისო ბიუროს ეგიდით ტარდება. გამოფენაში 120-ზე მეტი ქვეყანა მიიღებს მონაწილეობას.

ინფორმაციას ეკონომიკის სამინისტროს პრესსამსახური ავრცელებს.