მაჭავარიანი გივი თარგამაძესა და გიორგი კანდელაკზე: ეს არის უსამშობლოთა გაერთიანება, რომლებიც ყველაფერს აკეთებენ იმისთვის, რომ ქვეყანას რამენაირად ავნონ

 აუდიოჩანაწერზე, რომელიც „იმედის“ ოფიციალურ ელექტრონულ ფოსტაზე გუშინ გამოიგზავნა, შეფასებას აკეთებს ფრაქცია „ქართული ოცნების" თავმჯდომარის პირველი მოადგილე, ლევან მაჭავარიანი. საუბარია გივი თარგამაძის და გიორგი კანდელაკის სატელეფონო საუბარზე, რომლის ავთენტიკურობა დადგენილი არ არის.

„ეს არის უსამშობლოთა გაერთიანება, რომლებიც ყველაფერს აკეთებენ იმისთვის, რომ რამენაირად ავნონ ჩვენს ქვეყანას და ფიქრობენ, რომ თუ რაღაც უბედურება დატრიალდება საქართველოში, მხოლოდ მაგ შემთხვევაში აქვთ შანსი, რომ ხელისუფლება ხელში ჩაიგდონ.

ერთმანეთი ეზიზღებათ, არის რამდენიმე აქტორი, რომელიც პირდაპირ სატელეფონო ჩანაწერებსაც ინახავს იმისთვის, რომ შემდეგ ერთმანეთი აშანტაჟონ. ეს არის ხალხი, რომლებსაც არ გამოუსწორდებათ მავნებლური ბუნება, ჩაწერა და გადაღება მათი ხელწერაა“, - აღნიშნა ლევან მაჭავარიანმა.