ლევან მაჭავარიანი დიდი ბრიტანეთის მიერ ქართველი მოსამართლეების დასანქცირებაზე: ეს თავისთავად, პირდაპირ გლობალური ომის პარტიის და „დიფ სთეითის“ გავლენებზე მიუთითებს კონკრეტულად ბრიტანეთშიც და ეს მხოლოდ ჩვენი შეფასება არ არის

ეს თავისთავად, პირდაპირ გლობალური ომის პარტიის და „დიფ სთეითის“ გავლენებზე მიუთითებს კონკრეტულად ბრიტანეთშიც და ეს მხოლოდ ჩვენი შეფასება არ არის, - განაცხადა ფრაქცია „ქართული ოცნების" თავმჯდომარის მოადგილემ, ლევან მაჭავარიანმა დიდი ბრიტანეთის მთავრობის მიერ ქართველი მოსამართლეების - ლევან მურუსიძისა და მიხეილ ჩინჩალაძის დასანქცირების შეფასებისას.

„არაერთხელ გვისაუბრია ბრიტანეთზეც, მათ მიდგომებზეც, როდესაც ისინი რაღაც სანქციებით გვემუქრებიან. ამ შემთხვევაშიც მოსამართლეებს ასანქცირებენ და ამბობენ, მტკიცებულებები და ფაქტები არ გაგვაჩნია, უბრალოდ, რაღაც ეჭვები არისო. ეს თავისთავად, პირდაპირ გლობალური ომის პარტიის და „დიფ სთეითის“ გავლენებზე მიუთითებს კონკრეტულად ბრიტანეთშიც და ეს მხოლოდ ჩვენი შეფასება არ არის. თუ გავიხსენებთ, ერთი თვის წინ ქალბატონმა ლიზ ტრანსმა, რომელიც რამდენიმე წლის გახლდათ ბრიტანეთის პრემიერ-მინისტრი, ორი ინტერვიუ ჩაწერა და ორივე ინტერვიუში ხაზი გაუსვა იმას, რომ „დიფ სთეითს“ უფრო ფართოდ აქვს ფესვები გადგმული დიდ ბრიტანეთში, ვიდრე შეერთებულ შტატებში“, - განაცხადა ლებან მაჭავარიანმა.

დიდი ბრიტანეთის მთავრობამ საქართველოს იუსტიციის უმაღლესი საბჭოს წევრი, თბილისის სააპელაციო სასამართლოს მოსამართლე, ლევან მურუსიძე და თბილისის სააპელაციო სასამართლოს თავმჯდომარე, მიხეილ ჩინჩალაძე ისე დაასანქცირა, რომ განმარტებით ბარათში მოსამართლეების არაკეთილსინდისიერებაზე მხოლოდ ეჭვებსა და ვარაუდების დონეზეა საუბარი.